Israddedigion dawnus yn cystadlu yn Her Prifysgolion TRADA 2020 ym Mhrifysgol Caerdydd

Cafodd Her Prifysgolion TRADA 2020 ei chynnal gan yr Ysgol Beirianneg ac fe'i cynhaliwyd rhwng 17 a 19 Chwefror.

Ffurfiodd tua 58 o fyfyrwyr o brifysgolion ar draws y DU dimau a daethant ynghyd i gymryd rhan mewn cystadleuaeth i ddylunio, costio a pheiriannu'r prosiect tai cymunedol gorau o ran adeiladu coed, carbon isel, ynni a dŵr.

Roedd gan y myfyrwyr lai na 48 awr i gwblhau eu prosiectau.  Roedd pob tîm yn cynnwys peirianwyr myfyrwyr, penseiri, technolegwyr pensaernïol, syrfewyr meintiau a phenseiri tirwedd, ac yn cael cymorth ymarferol gan weithwyr proffesiynol dylunio arloesol ac aelodau o'r diwydiant, gan gynnwys beirniad o  Mikhail Riches, Cullinan Studio, Stride Treglown, Ramboll, BuroHappold, Entuitive, Gardiner & Theobald and PLAN:design.

Rhoddwyd y brîff iddynt gan Gymdeithas Tai Cymru a'r Gorllewin ar gyfer safle gwledig mawr yn Adams Drive, Arberth, a osododd gyfyngiadau go iawn i'r myfyrwyr fynd i'r afael â nhw a dylunio yn eu herbyn. Roedd y brîff, a oedd yn cynnwys cyfuniad o gartrefi ar gyfer rhent cymdeithasol, perchentyaeth cost isel a'r farchnad agored, yn gofyn am adeiladau carbon isel neu ddi-garbon gyda dull gweithredu ffabrig-cyntaf, creu lle sensitif a chanolbwynt y gellid creu cymuned o'i gwmpas.

Enillodd chwe myfyriwr talentog y wobr gyntaf am ddyluniad eu cynllun tai sy'n seiliedig ar goed yn Her Prifysgolion TRADA 2020. Kyle Crossley o Brifysgol Leeds Beckett, Ryan Jessop o Brifysgol Hertfordshire, Aslinn Aijian Zha o'r Ysgol Peirianneg ym Mhrifysgol Caerdydd, Kai Yusaf Chelliah o Brifysgol Bryste, Kat Cookes o Brifysgol Swydd Gaerloyw ac Aaron Shaw o Brifysgol Sheffield Hallam a wnaeth oresgyn naw tîm cystadleuol i ennill gwobr ariannol a gadael yn enillwyr.

Dywedodd y Beirniad Rob Wheaton o Stride Treglown y caiff cystadleuwyr eu profi drwy ddehongli 'briff technegol heriol iawn mewn cyn lleied o amser'. Pwysleisiodd anawsterau dod o hyd i ffyrdd arloesol o ddefnyddio pren a chynnwys egwyddorion Passivhaus, a hynny oll tra'n bodloni gofynion diffiniol y cleient ac yn gweithio i gyfyngiadau'r safle.

Cyfaddefodd Ryan Jessop, un o ddau bensaer o fewn y tîm buddugol: 'Dyma'r gystadleuaeth ddylunio gyntaf dw i wedi ei gwneud, felly mae dod yn gyntaf yn syfrdanol. Pe na bai gennym y syrfëwr meintiau a'r peirianwyr yn rhoi eu cyfiawnhad, mae'n debyg y byddem wedi gwneud rhywbeth braidd yn fwy gwallgof – ond [yn seiliedig ar eu mewnbwn] fe wnaethom gynllunio rhywbeth realistig, a dyna pam y gwnaethom greu bawdbrint adeilad yn gyflym iawn y gallem ei roi i'r peirianwyr. Ar ôl iddyn nhw wneud iddo weithio, fe wnaethon ni weithio ar gynlluniau'r ystafelloedd.'

Dywedodd Dr Aled Davies o'r Ysgol Peirianneg, a gynhaliai'r digwyddiad: "Roedd yn wych gweld cymaint o fyfyrwyr israddedig talentog o wahanol ddisgyblaethau yn gweithio gyda'i gilydd ac yn defnyddio dull amlddisgyblaethol i ddatrys her dechnegol mewn bywyd go iawn. Roeddem yn falch o allu cynnal y digwyddiad yma ym Mhrifysgol Caerdydd."

Dywedodd Tabitha Binding, Rheolwr Rhaglen Ymgysylltu'r Brifysgol yn TRADA: 'Mae hi bob amser yn anrhydedd i drefnu Her Flynyddol Prifysgolion TRADA. Bob blwyddyn, rwy'n falch iawn o weld drosof fy hun ymroddiad ac angerdd pawb sy'n ymwneud â'r gwaith. Roedd y beirniaid yn rhyfeddu at y ffordd yr oedd unigolion o wahanol brifysgolion a disgyblaethau'n dod ynghyd i ffurfio timau dylunio cydlynus mewn cyn lleied o amser. Mae’n rhaid llongyfarch yr enillwyr a goreuon y gweddill - mae eu gwaith caled a'u gweledigaeth wedi arwain at ddyluniadau ystyriol ac ecogyfeillgar sy'n seiliedig ar goed, y fath o ddyluniadau sydd eu hangen arnom ar hyn o bryd. Diolch i'n noddwyr, cefnogwyr, a gwesteiwyr Caerdydd am helpu i wneud Her Prifysgol TRADA 2020 yn llwyddiant ysgubol.'