Busnesau yng Nghymru yn elwa o £1m i ddatblygu syniadau newydd

Mae rhaglen uchelgeisiol i ysgogi arloesedd yn y sector creadigol wedi dyfarnu cyfanswm o £1m mewn grantiau i 23 o fusnesau yn ne Cymru.  

Mae Clwstwr – o dan arweiniad Prifysgol Caerdydd, ar y cyd â Phrifysgol De Cymru a Phrifysgol Metropolitan Caerdydd – yn rhaglen ymchwil a datblygu pum mlynedd o hyd sydd â'r nod o feithrin canolfan gynhyrchu'r cyfryngau o amgylch prifddinas Cymru. Mae wedi'i hariannu drwy Strategaeth Ddiwydiannol Llywodraeth y DU ac arian cyfatebol gan Lywodraeth Cymru, a galwodd am ymgeiswyr am y tro cyntaf yn gynharach eleni. Yn dilyn proses hynod gystadleuol, dewiswyd y garfan gyntaf.

Mae cwmnïau ffilm a theledu, busnesau technoleg, sefydliadau creadigol a gweithwyr llawrydd ymysg y rhai fydd yn derbyn arian ac yn gweithio gydag academyddion i ddatblygu eu cynnyrch, gwasanaethau a phrofiadau newydd.

Mae'r prosiectau cychwynnol yn cynnwys gwasanaeth newyddion ar gyfer ysgolion, cyfleusterau golygu o bell i dyfu'r sector ôl-gynhyrchu yn y rhanbarth, a defnyddio technoleg i drawsnewid y ffyrdd y mae pobl yn creu a phrofi dawns. Bydd cyfranogwyr yn ymchwilio i fformatau newydd ar gyfer adrodd storïau gan gynnwys dogfennau rhyngweithiol, gemau afliniol a hybrid rhwng ffilm, teledu, theatr a gemau realiti amgen. Bydd y garfan yn ymchwilio ac yn datblygu syniadau sy'n cynnwys deallusrwydd artiffisial yn yr ystafell newyddion, canolfan ar gyfer cynnwys pêl-droed menywod a stiwdio ffilmiau realiti rhithwir.

Yn ôl cyfarwyddwr Clwstwr, yr Athro Justin Lewis: "Mae ein carfan Clwstwr gyntaf yn cynnig amrywiaeth gyffrous o brosiectau ac mae safon y ceisiadau a ddaeth i law yn brawf o'r sector cyfryngau lewyrchus sydd yma yn ne Cymru. Yn ogystal â gwella'r diwydiannau sgrîn a newyddion, mae gan y prosiectau a ddewisir hefyd y potensial i wella sectorau eraill fel addysg, gofal iechyd a busnes.

Meddai’r Arglwydd Elis-Thomas, Dirprwy Weinidog Diwylliant, Chwaraeon a Thwristiaeth Llywodraeth Cymru: “Mae’r diwydiannau creadigol yn werth bron i £1 biliwn i Gymru bob blwyddyn ac mae’n un o’r sectorau sy’n tyfu gyflymaf yn y DU. Mae Cymru wedi mwynhau mwy o lwyddiant nag erioed dros y blynyddoedd diwethaf. Mae cefnogaeth Llywodraeth Cymru yn helpu i ddenu a chynhyrchu dramâu teledu llwyddiannus, ffilmiau a llwyth o bethau eraill. Mae’n arddangos Cymru i’r byd ac yn cefnogi swyddi lleol a rhoi hwb i’r economi ar yr un pryd.

“Rydym ar adeg dyngedfennol pan mae sawl cyfle yn dod ynghyd. Os bydd y gefnogaeth gywir ar gael dros y blynyddoedd nesaf, gall y diwydiant fynd o nerth i nerth gan gynnig hyd yn oed yn fwy o fanteision i Gymru.

“Rydym yn croesawu’r buddsoddiad sylweddol hwn mewn Ymchwil a Datblygu yn y Diwydiannau Creadigol ac yn falch o allu cynnig yr arian cyfatebol a helpodd i sicrhau’r rhaglen i Gymru.”

Mae’r Clwstwr yn dod â holl brif ddarlledwyr Cymru, gan gynnwys BBC Cymru Wales, S4C ac ITV Cymru ynghyd â chwmnïau cynhyrchu ffilm a theledu annibynnol, cwmnïau cenedlaethol a chyrff creadigol Cymru, mannau cydweithio creadigol, cwmnïau technegol newydd, asiantaethau strategol gan gynnwys Cyngor Celfyddydau Cymru, awdurdodau lleol gan gynnwys Cyngor Caerdydd a'r llywodraeth at ei gilydd.

I gael rhagor o wybodaeth am y garfan gyntaf, ewch i www.clwstwr.org.uk

_{Dyma'r prosiectau Clwstwr sydd wedi eu hariannu gyntaf:}

• _{Deallusrwydd Artiffisial yn yr Ystafell Newyddion (AMPYFI)}
• _{Bombastic Digi Platform (Bombastic)}
• _{CaseFinder (Caerphilly Media)}
• _{Creu Platfform Newydd ar gyfer Rheoli Cynyrchiadau (Stiwdio Bait)}
• _{Prosiect Ffilm a Gemau (Severn Screen)}
• _{FutureNews Labs (Tinint)}
• _{Dweud Storïau'n Dameidiog, wedi'u Geoleoli (Yello Brick)}
• _{Canolfan Pêl-droed Menywod Ryngwladol (Nimble Productions)}
• _{Image Vision (Object Matrix)}
• _{Fformat Rhaglenni Dogfen Rhyngweithiol (Hidden Narratives)}
• _{Life Lab (Martha Stone Productions)}
• _{Gwnaed yng Nghymru (Film Hub Cymru)}
• _{Moving Layers (Cwmni Dawns Cenedlaethol Cymru)}
• _{Adrodd y Newyddion drwy Newyddiaduraeth Fodiwlaidd (Monnow Media)}
• _{Ffurfweddu 3D mewn Amser Real (Bomper Studio)}
• _{Rendro mewn Amser Real / Hyrwyddo Rhyngweithiol (Good Gate Media)}
• _{Ailddyfeisio prosesau cynhyrchu animeiddio gyda thechnoleg peiriant gemau (Cloth Cat Animation)}
• _{Cyfleuster Golygu Creadigol o Bell (Gorilla TV)}
• _{Newyddion Ysgolion (Core)}
• _{Setpiece (Painting Practice)}
• _{Ysglyfaethwyr y Gofod (Galactig)}
• _{Dwyn Arbenigedd Cymreig Un ar ôl y Llall i'r Farchnad Ryngwladol (Triongl)}
• _{Defnyddio Realiti Rhithwir i Drawsnewid y Profiad o Eni Plentyn (Rescape)}