Y Saith Ysblennydd
19 Chwefror 2019
Mae arbenigwr mewn arloesedd systematig wedi cyflwyno cynulleidfa o ymarferwyr busnes, academaidd a thrydydd sector i ‘gyflenwi egwyddor gyntaf’ yn Sesiwn Hysbysu Brecwast ddiweddaraf Ysgol Busnes Caerdydd.
Gwnaeth yr Athro Darrell Mann, Prif Swyddog Gweithredol a Chyfarwyddwr Technegol Systematic Innovation, amlinellu’r ffyrdd y mae ei sefydliad yn gweithio ar draws disgyblaethau busnes i gyflawni arloesedd drwy ddadansoddi pob prosiect ar lefel yr egwyddor gyntaf.
Yn ystod y 18 mlynedd ddiwethaf, mae’r Athro Mann a’i gydweithwyr wedi helpu llawer o gwmnïau gorau’r byd i greu eiddo deallusol cryfach ac wedi cymryd rhan yn y gwaith o greu mwy na 500 o ddyfeisiau.
“Dyna beth sy’n ein galluogi i fynd i bob gwahanol ddiwydiant bron gyda neges sy’n dweud, os ydym yn deall eich diwydiant ar y lefel egwyddor gyntaf hon, mae’n bur debyg y byddwn yn llwyddo i gyflenwi arloesedd.”
Terabeitiau a therabeitiau o wybodaeth
Trwy gyfres o astudiaethau achos a oedd yn ymdrin â’r sectorau yswiriant, gwasanaethau TGCh, cyfryngau cymdeithasol a deallusrwydd artiffisial, dangosodd yr Athro Mann mai’r ffordd gyflymaf a mwyaf effeithiol o arloesi yw drwy’r gylchred ddata rinweddol.
Meddai’r Athro Mann: “Os oes terabeitiau a therabeitiau o wybodaeth yn dod i mewn i algorithmau sefydliadau bob dydd, yna maen nhw’n mynd i ddysgu’n gyflym iawn.
“A phan ydych wedi hyfforddi’r algorithmau hynny ar yr hyn i edrych amdano, yna byddant yn dysgu’n gyflymach. Bydd hyn yn arwain at gylchred rinweddol lle po fwyaf o ddata rydych chi’n ei gael, gorau’n byd y gallwch baratoi’r peth nesaf. Gallai’r rhain fod yn gynhyrchion neu’n ymgysylltiad sy’n annog cwsmeriaid i rannu rhagor o wybodaeth.”
Straeon llwyddiant gwyrdroi prosesau
Ar ôl creu darlun eithaf pesimistaidd o’r dirwedd arloesi yn hanner cyntaf ei gyflwyniad, trodd yr Athro Mann at straeon llwyddiant cwmnïau nad ydynt â mynediad i’r mathau o ddata a gronnir gan gwmnïau fel Google, Facebook, Apple ac ati.
Eglurodd sut yr oedd ffigurau cyfartaledd y diwydiant yn ddiwerth wrth drafod arloesedd. Yn hytrach, rhaid i sefydliadau edrych ar ymylon data o’r fath a gofyn pa brosesau a gweithdrefnau a wnaeth yr un y cant hynny eu dilyn na ddilynwyd gan y gweddill.
Meddai’r Athro Mann: “Edrychwch ar y straeon llwyddiannus a cheisiwch wyrdroi’r prosesau sy’n sail i’r hyn y mae’r sefydliadau hyn yn ei wneud.”
Am ddim, yn berffaith a nawr
Clodd yr Athro Mann ei gyflwyniad drwy ddisgrifio’r ffordd y mae’r egwyddor gyntaf nid yn unig yn gyrru sefydliadau tuag at fodel sy’n canolbwyntio ar gwsmeriaid, ond hefyd yn creu system lle y mae popeth yn datblygu tuag at fod am ddim, yn berffaith a nawr.
Rhannwyd enghreifftiau o’r diwydiant yswiriant lle roedd polisïau’n ddiderfyn, am ddim, yn anweladwy, yn dryloyw ac yn uniongyrchol a hefyd o’r diwydiant peiriannau torri glaswellt, sydd â’r nod yn y pen draw o greu glaswellt di-dwf.
Caniataodd y rhain i’r Athro Mann ddiwedd drwy egluro bod arloeswyr llwyddiannus bob amser yn edrych am y pethau anghyson ac yn eu datrys.
“Sicrhewch eich bod yn gwybod ym mhle mae perffaith. Efallai na fyddwch byth yn ei gyrraedd mewn gwirionedd, ond o leiaf rydych chi’n gwybod ym mhle y mae.”
Rhwydwaith yw'r gyfres Sesiynau Hysbysu Brecwast Addysg Weithredol sy'n galluogi cysylltiadau busnes i gael rhagor o wybodaeth am y gwaith ymchwil diweddaraf a datblygiadau allweddol gan bartneriaid diwydiannol.
Os nad oeddech yn gallu dod, edrychwch ar ein ffrwd fyw o’r digwyddiad.
Bydd yr Athro Mann yn dychwelyd i Ysgol Busnes Caerdydd ar ddydd Llun 29 Ebrill, pan fydd yn cyflwyno Dosbarth Meistr Arloesedd o’r enw: DNAArlesoedd: Canllaw'r pragmatydd i arloesedd.
Cofrestrwch nawr a pharatowch ar gyfer dysgu sut y gallwch chi a’ch busnes gyflawni newid sylweddol arloesol heb fawr o risg mewn marchnadoedd di-drefn ac oes ddi-drefn.
