Chemistry of Pollutants

Dathlodd ymchwilwyr o’r Ysgol Cemeg yr Wythnos Gemeg Genedlaethol drwy gynnal digwyddiad allgymorth ar gyfer plant ysgol lleol am gemeg ein hamgylchedd.

Cafodd digwyddiad “Cemeg Llygryddion - Deall ein Hamgylchedd” ei gynnal yn Amgueddfa Cymru ar 24 Tachwedd gyda dros 700 o bobl yn bresennol. Y Gymdeithas Gemeg Frenhinol a noddodd y digwyddiad yn rhan o brosiect blwyddyn o hyd sy’n ceisio cynnal gweithgareddau ymarferol mewn ysgolion lleol sy’n ategu’r cwricwlwm.

Roedd y gweithgareddau ar gyfer y plant ysgol yn cynnwys sbectrosgopeg ffonau clyfar i ddangos bandiau allyriadau elfennol, cromatograffeg ymarferol a strwythurau mandyllog, dulliau wedi’u pweru gan bedalau o rannu dŵr er mwyn cynhyrchu hydrogen, ac edrych ar fecanwaith ffurffio cymylau.

Cafodd y digwyddiad ei baratoi a’i drefnu gan Dr Joseph Beames a Dr Emma Richards mewn partneriaeth â Dr Jana Horak (Pennaeth Mwynoleg a Phetroleg, Amgueddfa Cymru).  Cymerodd nifer o israddedigion ac ôl-raddedigion ran yn y digwyddiad, o dan arweiniad Alexander Tansell (myfyriwr PhD 3edd flwyddyn), drwy arddangos y gweithgareddau a rhyngweithio ag ymwelwyr.