Grŵp dethol i dderbyn Cymrodoriaethau Anrhydedd

Mae chwaraewr rygbi rhyngwladol Cymru, darlledwraig enwog, nofelydd Prydeinig sydd wedi ennill sawl gwobr ac un o entrepreneuriaid mwyaf llwyddiannus manwerthu yn y DU ymysg y rhai gaiff eu hanrhydeddu yn ei seremonïau graddio blynyddol yr wythnos yma (13 - 17 Gorffennaf, 2015).

Bydd capten tîm rygbi Cymru Sam Warburton, yn ymuno â'r ddarlledwraig Susanna Reid, sylfaenydd JoJo Maman Bébé, Laura Tenison MBE a'r nofelydd Prydeinig, Philippa Gregory i dderbyn yr anrhydeddau, sy'n cael eu dyfarnu i unigolion sydd wedi cael cydnabyddiaeth ragorol yn eu maes.

Bydd pum ffigwr blaenllaw pellach o feysydd yn cynnwys y celfyddydau, datblygiad rhyngwladol a gwyddoniaeth hefyd yn derbyn Cymrodoriaethau.  Mae'r rhain yn cynnwys y cyfarwyddwr opera David Pountney; sylfaenydd Africaid Marcus McGilvray; y biolegydd Anne Glover CBE; Prif Swyddog Gweithredol Stonewall Ruth Hunt ac Is-Lywydd Gweithredol ar gyfer Shell, Ceri Powell.

Bydd Sam Warburton yn derbyn Cymrodoriaeth er Anrhydedd i gydnabod ei lwyddiannau chwaraeon rhagorol. Mae'r rhain yn cynnwys bod y capten tîm rygbi Cymru gyda'r mwyafrif o gapiau, a'r ail ieuengaf mewn hanes. 

Mae Susanna Reid, a ddechreuodd ar ei gyrfa ddisglair mewn newyddiaduraeth yn 1993 pan hyfforddodd yn Ysgol Astudiaethau Newyddiaduraeth, y Cyfryngau a Diwylliant Prifysgol Caerdydd, yn cael ei chydnabod am ei chyfraniad i ddarlledu.

Un arall sy'n cael ei anrhydeddu yw Philippa Gregory, a alwyd yn 'frenhines ffuglen hanesyddol Prydain' am ei nofelau sydd wedi ennill sawl gwobr, yn cynnwys The Other Boleyn Girl. Bydd hi'n derbyn Cymrodoriaeth am ei chyfraniad i lenyddiaeth.

Caiff Laura Tenison MBE, ei chydnabod am ei rôl mewn diwydiant. Mae ei brand mam a'i baban, JoJo Maman Bébé wedi tyfu i fusnes gyda throsiant o £50m a 700 o weithwyr.

Bydd mwy na 6,000 o fyfyrwyr yn graddio yn y seremonïau eleni, a bydd tua 30,000 o bobl yn cael eu croesawu i Gaerdydd ar gyfer y dathliadau.  Mae'r digwyddiad yn un o'r rhai mwyaf yng nghalendr y Brifysgol a bydd y seremonïau yn cael eu darlledu'n fyw yn ardal yr Aes, Caerdydd, yn ogystal â'u ffrydio ar wefan y Brifysgol.

Y Cymrodyr er Anrhydedd am 2015

Philippa Gregory

Roedd Philippa Gregory yn hanesydd a llenor sefydledig pan ddarganfu ei diddordeb yng nghyfnod y Tuduriaid ac ysgrifennodd y nofel The Other Boleyn Girl, a wnaed i mewn i ddrama deledu a ffilm fawr.  Yn awr, 14 nofel yn ddiweddarach, mae hi'n dychwelyd at y Tuduriaid gyda chweched gwraig Harri'r VIII, Kateryn Parr.  Diddordeb mawr arall Philippa yw'r elusen a sefydlodd bron 20 mlynedd yn ôl: Gardens for The Gambia. Mae'r elusen wedi codi arian ar gyfer tua 200 o ffynhonnau mewn ysgolion cynradd y wlad Affricanaidd sych a thlawd iawn hon. Mae miloedd o blant ysgol wedi gallu dysgu garddio marchnad a thyfu bwyd i'w fwyta yn y gerddi ysgol sy'n cael eu dyfrio gan y ffynhonnau.  

Mae'r elusen hefyd yn darparu ffynhonnau ar gyfer gerddi ar y cyd i fenywod ac ar gyfer unig goleg amaethyddol Gambia yn Njawara.  Graddiodd Philippa o Brifysgol Sussex gyda gradd mewn Hanes, a derbyniodd PhD mewn Hanes yn llenyddiaeth y 18fed ganrif o Brifysgol Caeredin. Yn 2009 cafodd ddyfarniad  Alumna y Flwyddyn gan Brifysgol Caeredin.  Mae hi hefyd yn adolygu ar gyfer The Washington Post, yr LA Times, ac ar gyfer papurau newydd y DU, ac yn ddarlledwr cyson ar y teledu a'r radio. Mae hi'n postio'n rheolaidd i'w llu o ddilynwyr ar Facebook a Twitter.

Ruth Hunt

Penodwyd Ruth Hunt yn Brif Weithredwr Stonewall ym mis Awst 2014, ar ôl gweithio mewn swyddi uwch yn y sefydliad ers 2011.  Mae hi wedi llwyddo i arwain datblygiad arloesol allbynnau polisi, ymgyrchu ac ymchwil Stonewall, gan gynnwys ei waith i fynd i'r afael â bwlio homoffobaidd mewn ysgolion, ymyriadau effeithiol i wella iechyd pobl lesbiaidd, hoyw a deurywiol a rhaglenni datblygu arweinyddiaeth enwog Stonewall. 

Ers cymryd yr arweinyddiaeth, mae Ruth wedi ymrwymo i ddod â Stonewall hyd yn oed yn ddyfnach i mewn i gymunedau, gan ymgysylltu â grwpiau o wahanol ethnigrwydd, crefydd a daearyddiaeth - yn y DU a thramor.  Mynychodd Ruth Goleg St. Hilda, Rhydychen lle bu'n astudio Saesneg ac fe'i hetholwyd yn Llywydd Undeb y Myfyrwyr Rhydychen.  Yn 2014, cafodd Ruth ei phleidleisio'n wythfed person LHDT (LGBT) mwyaf dylanwadol ym Mhrydain yn Rhestr Rainbow yr Independent.

Dr Ceri M Powell

Daw Ceri o Sir Benfro.  Graddiodd gyda BSc. mewn Daeareg o Brifysgol Lerpwl, a gyda PhD mewn Daeareg Strwythurol o Brifysgol Cymru (Caerdydd).  Ymunodd Ceri â Shell yn 1990, ac mae wedi gweithio fel geowyddonydd yn y DU, Angola, Malaysia, yr Iseldiroedd, a'r Emiraethau Arabaidd Unedig.

Yn 2009 apwyntiwyd hi'n Is-Lywydd Gweithredol Exploration for Shell, yn goruchwylio holl agweddau technegol archwilio'r cwmni ac yn atebol am weithrediadau archwilio a chyfleoedd busnes newydd yn Ewrop, Affrica, y Dwyrain Canol, Rwsia, Asia ac Awstralia.  Mae'n aelod gweithgar o Fwrdd Ymgynghorol mawreddog rhaglen y Cenhedloedd Unedig Ynni Cynaliadwy i Bawb, dan gadeiryddiaeth Ysgrifennydd Cyffredinol y Cenhedloedd Unedig.  

Yn 2014 cafodd Ceri Ddoethuriaeth er Anrhydedd mewn Gwyddoniaeth o Brifysgol Heriot-Watt am wasanaethau i Wyddorau'r Ddaear.  Ers 2014 mae wedi gwasanaethu fel Cyfarwyddwr Anweithredol ar Fwrdd Carillion PLC ac fel Cadeirydd y Pwyllgor Bwrdd Cynaliadwyedd.  Mae hi'n byw yn Yr Hag yn Yr Iseldiroedd, ac mae ganddi hefyd gartref yn y Cotswolds lle mae'n arddwr brwd sy'n arbenigo mewn perlysiau meddygol.  Fel un o'r prif fenywod yn y Diwydiant Ynni heddiw, mae Ceri wedi ennill yr anrhydedd o fod ar y rhestr Fortune Top 50 o'r Menywod mwyaf pwerus mewn Busnes Rhyngwladol, ddwywaith yn 2013 ac eto yn 2014.  Mae hi wedi'i rhestru ar hyn o bryd yn Rhif 21.

Marcus McGilvray

Magwyd Marcus McGilvray yn Sir Fynwy a hyfforddodd yn Llundain fel Nyrs Arbenigol HIV.  Bellach yn byw yn KwaZulu Natal, De Affrica, Marcus yw sylfaenydd a Phrif Swyddog Gweithredol Africaid - Whizzkids United, cwmni dielw sy'n darparu gwasanaethau iechyd, addysg a grymuso i bobl ifanc dan anfantais.  Mae mwy na 20 o raglenni yn ffurfio WhizzKids United (i gyd wedi'u cynllunio gan Marcus) gan gynnwys iechyd rhywiol ac atgenhedlu, atal HIV a thriniaeth, gofal a chymorth OVC, grymuso merched a chynghrair pêl-droed i'r ddau ryw i gyd yn rhedeg o Academi Iechyd WhizzKids United. 

 Yn y tair blynedd diwethaf mae mwy na 35,000 o bobl ifanc rhwng 12 a 20 oed ar draws Affrica wedi defnyddio gwasanaethau Africaid.  Mae'r Athro Bruce Walker, ymchwilydd blaenllaw o HIV/Aids yn Ysgol Feddygol Harvard yn disgrifio Whizzkids fel "un o'r rhaglenni atal HIV mwyaf trawiadol a welais erioed."  Yn 2010 a 2102, cymeradwywyd Whizzkids United gan Gynghorydd Arbennig y Cenhedloedd Unedig i'r Ysgrifennydd Cyffredinol ar gyfer Datblygu Chwaraeon a Heddwch.  Gwnaed Marcus yn Brif Ghanaidd yn 2013 i anrhydeddu ei gyfraniad i'r gymdeithas Affricanaidd.

David Pountney

Enillodd David Pountney ei enw fel cyfarwyddwr rhyngwladol gyda'i gynhyrchiad o Katya Kabanova yng Ngŵyl Wexford 1972.  Rhwng 1975 a 1980, roedd yn Gyfarwyddwr Cynyrchiadau ar gyfer Opera'r Alban.  Roedd cynyrchiadau yno yn cynnwys cylch Janáček mewn cydweithrediad ag Opera Cenedlaethol Cymru. Cyfarwyddodd bremière y byd Toussaint gan David Blake yn 1977 (ENO) ac aeth ymlaen i fod yn Gyfarwyddwr Cynyrchiadau ENO yn 1980, gan gyfarwyddo dros 20 o operâu.  Mae wedi cyfarwyddo nifer o berfformiadau cyntaf y byd, gan gynnwys tri gan Peter Maxwell Davies ac wedi cyfieithu operâu i'r Saesneg o'r Rwseg, Tsieceg, Almaeneg ac Eidaleg. 

 Fel cyfarwyddwr llawrydd o 1992 bu'n gweithio'n gyson yn Zurich, yn Opera'r Wladwriaeth yn Fienna, Bayerische Staatsoper, yn ogystal â thai opera yn America a Siapan, ac yn y DU mae ganddo gysylltiad hirsefydlog gydag Opera North.  Derbyniodd fedal Janáček am ei gylch Janáček yng Nghymru a'r Alban, a medal Martinů am ei gynyrchiadau o Julietta a Greek Passion (Opera North a Gŵyl Bregenz). 

Mae ei gynyrchiadau wedi ennill gwobr Olivier ddwywaith.  Mae ei gyflawniadau diweddar yn cynnwys Saul og David yn Copenhagen; The Passenger (Houston, Efrog Newydd a Chicago); Kommilitonen, ei drydedd opera a ysgrifennwyd ar y cyd â Peter Maxwell Davies (Yr Academi Gerdd Frenhinol a pherfformiad cyntaf yr Unol Daleithiau yn Ysgol Juilliard, Efrog Newydd) . Yn ogystal cyfarwyddodd opera newydd Philip Glass, Spüren der Verirrten, ar achlysur agor tŷ opera newydd yn Linz. Enillodd y Wobr Schickaneder ar gyfer y cynhyrchiad opera gorau yn 2013, a Die Zauberflöte ar gyfer y 'llwyfan llyn' yn Bregenz, lle'r oedd yn arolygwr o 2003 - 13. 

 Ers 2011 mae wedi bod yn Brif Weithredwr a Chyfarwyddwr Artistig Opera Cenedlaethol Cymru.  Mae'n CBE, Chevalier yn yr Ordre des Arts et Lettres Ffrengig ac mae ganddo'r Cavalier's Cross o Urdd Teilyngdod Gweriniaeth Gwlad Pwyl a dyfarnwyd yr Ehrenkreuz des Bundes Österreich iddo yn 2014.  Yn ddiweddar, enillodd Gymrodoriaeth er Anrhydedd o Goleg Brenhinol Cerdd a Drama Cymru i gydnabod ei gyfraniad fel artist ac arweinydd diwylliannol.