Ewch i’r prif gynnwys
Myfyrwyr newydd

Dod o hyd i ofal meddygol

Diweddarwyd ddiwethaf: 01/12/2023 10:14

Efallai bod y ffordd rydych chi’n dod o hyd i ofal meddygol yng Nghaerdydd yn wahanol i’r wlad lle buoch chi’n byw o'r blaen.

Gwnewch yn siŵr eich bod yn cofrestru mewn meddygfa cyn gynted â phosibl fel y gallwch chi wneud apwyntiad gyda meddyg a chael cymorth meddygol arferol neu frys os bydd angen hyn arnoch chi.

Cofrestrwch mewn meddygfa leol

Dewiswch sut rydych chi eisiau cofrestru gyda meddygfa yng Nghaerdydd:

I gofrestru, bydd gofyn y rhain arnoch chi:

  • Eich man geni
  • Eich cyfeiriad newydd yn ystod y tymor
  • enw a chyfeiriad y feddygfa lle rydych chi wedi'ch cofrestru ar hyn o bryd (os yw'n berthnasol)
  • hanes meddygol diweddar mewn perthynas ag alergeddau, meddyginiaeth, ystadegau hollbwysig, dewisiadau ffordd o fyw neu unrhyw ddiagnosis neu driniaeth barhaus

Os ydych chi eisiau cofrestru gyda meddyg sy'n siarad Cymraeg, neu feddyg sy'n siarad iaith aralledrychwch ar y meddygfeydd lleol sy'n gallu cynnig hyn.

Meddyginiaeth yn rhad ac am ddim yng Nghymru

Unwaith y byddwch chi wedi cofrestru mewn meddygfa yng Nghymru, bydd gennych chi’r hawl i feddyginiaeth ar bresgripsiwn am ddim.

Eich fferyllfa leol

Eich fferyllfa leol yw’r lle cyntaf i fynd i gael cyngor ar ofal iechyd a thriniaeth os bydd mân salwch megis annwyd a dolur gwddf, pen tost neu ddolur rhydd.

Cael gweld gweithwyr gofal iechyd proffesiynol eraill

Mae GIG 111 Cymru ar gael 24 awr y dydd, saith diwrnod yr wythnos. Defnyddiwch y gwasanaeth i gael gwybodaeth a chyngor ar iechyd a gofal sylfaenol brys.

Os bydd gofyn ichi fynd i’r Uned Achosion Brys (a elwir yn aml yn uned damweiniau ac achosion brys), yr Uned Mân Anafiadau neu gael gofal y tu allan i oriau dylech chi gysylltu â GIG 111 Cymru yn gyntaf.

Os oes gennych chi argyfwng difrifol neu sy'n bygwth bywyd, dylech chi ffonio 999.

Nid oes modd mynd i’r afael â phroblemau deintyddol mewn meddygfa, felly ystyriwch gofrestru mewn deintyddfa leol.

I gael gofal deintyddol brys, os nad ydych chi wedi cofrestru mewn deintyddfa, ffoniwch y Llinell Gymorth Ddeintyddol Frys ar 0300 10 20 247.

Os ydych chi'n cael problemau o ran iechyd eich llygaid, trefnwch apwyntiad gydag optometrydd. Dod o hyd i optometrydd lleol.

Rhwng mis Hydref a mis Mawrth rydyn ni’n cynnig profion llygaid am ddim ac apwyntiadau lensys cyffwrdd yn ein clinigau gan fyfyrwyr.

Mae eich fferyllfa leol yn gallu darparu cynnyrch dros y cownter megis condomau, profion beichiogrwydd ac atal cenhedlu brys.

Mae fferyllfeydd hefyd yn cynnig gwasanaethau atal cenhedlu'r GIG sy’n gyfrinachol, gan gynnwys darparu atal cenhedlu brys a phontio, cyngor ar ryw mwy diogel ac iechyd rhywiol, ac mae’r cyfan ar gael ym mhreifatrwydd ystafell ymgynghori.

Mae eich Clinig Iechyd Rhywiol lleol yn cynnig apwyntiadau y gallwch chi eu trefnu ymlaen llaw. Does dim rhaid ichi fynd at eich meddyg teulu cyn mynd i apwyntiad.

Caiff hanes eich brechiadau ei adolygu yn rhan o'ch Asesiad Iechyd Galwedigaethol. Gwnewch yn siŵr eich bod yn gallu darparu'ch cofnodion brechu diweddaraf.

Rydyn ni’n eich cynghori'n gryf i gadarnhau eich hanes imiwneiddio gyda'ch meddyg cyn teithio i Gaerdydd gan ei bod yn bosibl y bydd angen pigiad atgyfnerthu arnoch chi.  

Darllenwch ein canllawiau ar y brechiadau y bydd eu hangen arnoch chi hwyrach.

Os oes angen brechiadau arnoch chi ar ôl cyrraedd y DU, bydd gofyn ichi gofrestru gyda meddyg.