Agnieszka Pluta
Mae Agnieszka Pluta yn bianydd cyngerdd medrus ac yn addysgwr piano angerddol yn y DU.
Mae ganddi PhD mewn Ymarfer Perfformio o Brifysgol Caerdydd, ac mae wedi ymroi i ysbrydoli cerddorion ar bob lefel trwy berfformio ac addysgu.
Dechreuodd taith gerddorol Agnieszka yng Ngwlad Pwyl, lle cafodd ei haddysgu gan yr athrawon adnabyddus Monika Sikorska-Wojtacha, Robert Marat a Maria Szwajger-Kułakowska yn yr Academi Cerddoriaeth yn Katowice. Wrth barhau â'i haddysg yn y Coleg Brenhinol Cerdd yn Llundain, derbyniodd ysgoloriaeth lawn a Gwobr Medal Milstein fawreddog. Cafodd ei haddysgu gan Kevin Kenner a Nigel Clayton.
Trwy gydol ei gyrfa, mae wedi ennill sawl gwobr ryngwladol a chenedlaethol, gan gynnwys y Groes Teilyngdod Aur, Arian ac Efydd gan y gymuned Bwylaidd Brydeinig am ei chyflawniadau artistig ac addysgegol.
Yn berfformiwr, mae Agnieszka yn arbenigo mewn cerddoriaeth neo-Ramantaidd, gyda repertoire sy’n aml yn cynnwys gweithiau gan Paderewski, Chopin a Rachmaninov. Mae ei pherfformiadau cerddorol unigol a siambr wedi swyno cynulleidfaoedd ledled y DU ac Ewrop. Mae hynny’n cynnwys ei pherfformiad cyntaf yn Llundain yn St. James's Piccadilly yn 2007, a gafodd gryn glod. Mae wedi recordio albymau unigol a phodlediadau, gan rannu ei dehongliadau a'i dealltwriaeth o arddulliau pianistig Paderewski a'r traddodiad neo-Ramantaidd.
Yn addysgwr ymroddedig, mae Agnieszka ar hyn o bryd yn addysgu'r piano yn Ysgol Cerddoriaeth Prifysgol Caerdydd, lle mae'n mentora'r genhedlaeth nesaf o gerddorion. Cyn hynny, bu'n addysgu ym Mhrifysgol Birmingham, ac mae wedi arwain dosbarthiadau meistr yn y DU ac yn rhyngwladol, gan rymuso pianyddion i ddatblygu eu lleisiau artistig. Mae ei harbenigedd mewn perfformio ac addysgu’n cyfuno ysbrydoliaeth â dyfnder technegol ar gyfer ei myfyrwyr.
Mae cyfraniadau Agnieszka yn ymestyn y tu hwnt i'r llwyfan a'r ystafell ddosbarth. Mae hefyd yn awdur ac yn gyfansoddwr cyhoeddedig, gan rannu ei dealltwriaeth ddofn o gerddoriaeth trwy erthyglau a chyfansoddiadau. Mae Agnieszka wedi’i hanrhydeddu â sawl ysgoloriaeth ddiwylliannol gan Weinyddiaeth Diwylliant Gwlad Pwyl ac Arlywydd Zabrze. Mae’n parhau i ysbrydoli trwy ei chelfyddyd, ei haddysg a'i hymroddiad i'r gymuned gerddorol.