Mynegai Psoriasis y Teulu

Mae Mynegai Psoriasis y Teulu yn holiadur a gynlluniwyd ar gyfer aelodau o deulu neu bartneriaid sy'n oedolion (16 oed neu hŷn) cleifion (o unrhyw oed) sydd â psoriasis.

Ynglŷn â’r holiadur

Mae Mynegai Psoriasis y Teulu'n hunanesboniadol a gellir ei roi’n rhwydd i aelod o deulu neu bartner y claf, fydd yn ei gwblhau heb fod angen esboniad manwl.

Bwriad y cwestiynau yw asesu ansawdd bywyd ar adeg cwblhau'r holiadur.

Mae wedi'i gynllunio i'w ddefnyddio ar ei ben ei hun neu fel mesur canlyniad ychwanegol gydag unrhyw holiadur a gwblheir gan y claf, fel y Mynegai Ansawdd Bywyd Dermatoleg.

Pwy all ei ddefnyddio

Gall clinigwyr, cwmnïau fferyllol, cwmnïau er elw, myfyrwyr neu ymchwilwyr ddefnyddio'r holiadur mewn amrywiaeth o leoliadau.

Gan ddibynnu pwy ydych chi ac at ba ddiben rydych chi'n defnyddio'r holiadur, efallai y bydd angen i chi wneud cais am drwydded a thalu ffi.

Darllenwch fwy am bwy all ddefnyddio'r holiadur hwn a sut i'w weinyddu.

Amser cwblhau

Caiff ei gwblhau fel arfer o fewn dau i dri munud.

Lawrlwytho’r holiadur

Mae'r Holiadur ar gael yn Saesneg, Eidaleg a Phwyleg.

Fersiynau mewn ieithoedd gwahanol

Mae'r ffeil zip hon yn cynnwys fersiynau Eidaleg a Phwyleg yr holiadur, ynghyd â'r tystysgrifau cyfieithu. Darllenwch ragor am ein proses gyfieithu a dilysu ieithyddol, a beth i'w wneud os hoffech chi greu cyfieithiad newydd.

Sut i'w sgorio

Caiff pob cwestiwn ei sgorio fel a ganlyn:

• Ddim o gwbl = 0
• Ychydig = 1
• Cryn dipyn = 2
• Llawer iawn = 3
• Cwestiwn heb ei ateb = 0

Caiff cyfanswm sgôr Mynegai Psoriasis y Teulu ei gyfrifo drwy adio sgôr pob cwestiwn gan arwain at uchafswm o 42 ac isafswm o 0.

Po uchaf yw'r sgôr, y mwyaf mae’r cyflwr yn amharu ar ansawdd bywyd. Gellir mynegi Mynegai Psoriasis y teulu hefyd fel canran o’r sgôr uchaf posibl o 42.

Dehongli holiaduron sydd wedi'u cwblhau'n anghywir

Mae'r gyfradd sy'n llwyddo i gwblhau holiadur Mynegai Psoriasis y Teulu'n gywir yn uchel. Fodd bynnag, o bryd i'w gilydd ceir camgymeriadau. Os gadewir un cwestiwn heb ei ateb, caiff hwn sgôr o 0 a chaiff y sgoriau eu crynhoi a'u mynegi fel arfer allan o uchafswm o 42.

Os gadewir dau gwestiwn neu fwy heb eu hateb, ni chaiff yr holiadur ei sgorio. Os caiff dau neu fwy o opsiynau ymateb eu ticio, dylid cofnodi'r opsiwn ymateb sydd â'r sgôr uchaf.

Os ceir ymateb rhwng dau flwch ticio, dylid cofnodi'r isaf o'r ddau opsiwn ymateb.

Hawlfraint

Mae Mynegai Psoriasis y Teulu dan hawlfraint fyd-eang, felly rhaid i chi beidio â newid fformat, geiriad na dyluniad yr holiadur.

Y datganiad hawlfraint, sy'n gorfod cael ei ailargraffu bob amser ar ddiwedd pob copi o'r holiadur hwn ym mha bynnag iaith, yw:

© Mynegai Psoriasis y Teulu-14. A.M. Eghlileb, A.Y. Finlay, M.S. Salek, M.K.A. Basra, Mawrth 2014

Trwy gytundeb, mae'r Brifysgol bellach yn berchen ar ac yn gweinyddu'r holl faterion hawlfraint sy'n ymwneud â Mynegai Psoriasis y Teulu-14.

Cofrestriad Gwreiddiol Llyfrgell y Gyngres UDA

Rhif cofrestru: TXu001299116
Dyddiad cofrestru: 19 Mai 2006
Awduron: Dr AM Eghlileb a'r Athro AY Finlay

Cyhoeddiadau

Cyhoeddiad gwreiddiol

Eghlileb AM, Basra MKA, Finlay AY. The Psoriasis Family Index: preliminary results of validation of a quality of life instrument for family members of patients with psoriasis. Dermatology 2009; 219: 63-70

Cyhoeddiad gwreiddiol Mynegai Psoriasis y Teulu (fersiwn cyfredol)

Basra MK, Zammitt AM, Kamudoni P, Eghlileb AM, Finlay AY, Salek MS. PFI-14: a Rasch analysis refinement of the Psoriasis Family Index. Dermatology 2015; 231 (1): 15-23.

Cyhoeddiad allweddol arall

Eghlileb AM, Davies EEG, Finlay AY. Psoriasis has a major secondary impact on the lives of psoriasis family members and partners. British Journal of Dermatology 2007; 156: 1245-1250.

Cysylltu â ni

Os oes gennych unrhyw gwestiynau, neu os oes gennych adborth ar ein tudalennau gwe, cysylltwch â ni.

Ymholiadau cyffredinol

Ymholiadau trwyddedu, ariannol a chytundebol