Ystafell Ddosbarth Wyneb i Waered

Mae’r dull ‘Ystafell Ddosbarth Wyneb i Waered’ yn ffordd wych o roi cyfle Dysgu Gweithredol i fyfyrwyr. Mae Dysgu Gweithredol yn allweddol i’r ffordd rydyn ni’n addysgu mewn Addysg Uwch: annog myfyrwyr i ddod o hyd i wybodaeth cyn datblygu eu dealltwriaeth o’r deunydd hwnnw. Mae’n allweddol i ddyfnhau dealltwriaeth o’r pwnc a datblygu dysgwyr annibynnol.

Mae sesiwn draddodiadol sy’n canolbwyntio ar yr hyfforddwr (e.e. darlith) yn ymwneud â darparu gwybodaeth graidd yn ystod amser dosbarth, gyda gweithgareddau sy’n canolbwyntio ar y myfyriwr i’w cwblhau ar ôl y dosbarth. Mae dulliau Ystafell Ddysgu Wyneb i Waered yn ymwneud â gwrthdroi (neu ‘fflipio’) trefn y gweithgareddau hyn. Mae’r wybodaeth graidd bellach yn cael ei dysgu gan y myfyrwyr cyn y sesiwn gyswllt wyneb-yn-wyneb. Yna, gall y myfyrwyr ddefnyddio’r amser cyswllt i ddyfnhau ac atgyfnerthu’r dysgu hwnnw a meithrin dealltwriaeth fwy holistig o’r pwnc.

Gall dulliau ‘wyneb i waered’ hefyd alluogi’r darlithydd i fod yn fwy digymell ac ymatebol i anghenion y dosbarth, ac osgoi - mewn pynciau lle gallai hyn ddigwydd - cyflwyno’r un deunydd flwyddyn ar ôl blwyddyn. Gall yr amser cyswllt ganolbwyntio ar ddeunydd y mae myfyrwyr yn cael trafferth ag ef: defnyddio dealltwriaeth i ddatrys problemau neu ddadansoddi, deall meysydd y gellir eu datblygu, neu gynnig rhagor o gefndir ac ehangu gwybodaeth.

Mewn dysgu Wyneb i Waered, bydd angen i’r tiwtor ddod i benderfyniad ynglŷn â’r ffordd y bydd yn cyflwyno’r deunydd craidd, ac mae hyn fel arfer yn cael ei wneud drwy ddefnyddio fideo. Dylai’r adnodd ‘Learn Plus’, sy’n seiliedig ar Panopto, hwyluso’r dull hwn o baratoi deunydd addysgu. Fodd bynnag, mae cyfryngau eraill hefyd yn cael eu defnyddio, fel ffynonellau ysgrifenedig, ar-lein, sain neu rai gweledol eraill. Mae’r amrywiaeth o weithgareddau y gellir eu cynnal yn ystod y sesiynau byw yn ddiddiwedd, ond dylai pob un ymgysylltu â’r myfyrwyr drwy dasg weithredol, yn hytrach na bod yn sesiwn arall sy’n canolbwyntio ar gyflwyno rhagor o gynnwys/gwybodaeth sylfaenol.

Mae’r pwnc yn arddangos meysydd lle mae’r ‘Ystafell Ddosbarth Wyneb i Waered’ wedi bod yn llwyddiannus ar draws y Brifysgol, ac mae dulliau, cyfryngau a ffyrdd gwahanol o ymgysylltu â myfyrwyr drwy’r sesiynau ‘darlith’ byw wedi’u nodi. Mae’r dull gweithredu hwn yn cyfateb i nod Prifysgol Caerdydd o geisio annog myfyrwyr i fod yn gyfranogwyr gweithredol, cynnig amgylchedd dysgu cyfoethog ac arloesol, a defnyddio’r dechnoleg briodol i gefnogi dysgu ac addysgu.