Dynlunio ar gyfer dysgu o bell

Mae'r ffyrdd y mae myfyrwyr yn cymryd rhan mewn gweithgareddau academaidd yn newid yn gyson. Mae academyddion a thechnolegwyr dysgu o Brifysgol Caerdydd yn gweithredu amrywiaeth eang o ddulliau arloesol i wella profiad y myfyriwr drwy ddefnyddio technolegau dysgu. Mae rhyngwladoli a chyflogadwyedd yn elfennau hollbwysig o weledigaeth strategol Prifysgol Caerdydd ac mae rôl adnoddau o bell, adnoddau cyfunol ac adnoddau ar y we yn hanfodol bwysig wrth gyrraedd y weledigaeth hon.

Mae'r adnoddau hyn yn rhoi cyfle i academyddion rannu a lledaenu eu gwybodaeth a threfnu gweminarau a seminarau rhithwir. Maent hefyd yn cynnig cyfle i gydweithio'n agosach â sefydliadau eraill ac yn hwyluso'r cyfathrebu â myfyrwyr ar leoliadau a rhoi cyfarwyddiadau iddynt.

Nid ar gyfer posibiliadau cyfathrebu, rhoi cyfarwyddiadau a rhoi llwyfan i ddadlau o bell yn unig yw prif swyddogaeth yr adnoddau hyn. Yn wir, mae llawer o raglenni yn defnyddio dulliau ymgysylltu arloesol, hybrid ac amlochrog, lle caiff dysgu o bell ei integreiddio'n rhan o lwybrau dysgu eraill, neu'n cael ei ddefnyddio fel adnodd i gefnogi myfyrwyr.

Gall y dulliau rhyngweithio â myfyrwyr sy'n dysgu o bell amrywio o ddefnyddio ystafelloedd dosbarth rhithwir, gweminarau a chyflwyniadau, i ddefnyddio cyfryngau cymdeithasol, cyrsiau ar-lein enfawr ac agored (MOOC), a chreu atebion pwrpasol ar gyfer problemau.

Mae'r adran hon yn tynnu sylw at yr amryw o ddulliau a ddefnyddir gan Brifysgol Caerdydd i ehangu profiad dysgu'r myfyrwyr nad ydynt yn dysgu ar y campws, yn ogystal â'r ffyrdd y gall dulliau dysgu o bell gyfoethogi cwricwlwm y rhaglenni a ddysgir ar y campws.