Ewch i’r prif gynnwys
Ysgol y Gyfraith a Gwleidyddiaeth

Astudio dramor

Myfyriwr yn sefyll yn edrych dros orwel Barcelona

Mae astudio dramor yn cynnig cyfle ichi gwrdd â phobl newydd a ffurfio cyfeillgarwch a chysylltiadau sy'n gallu para oes.

Pam astudio dramor?

Mae byw a dysgu mewn gwlad wahanol yn datblygu sgiliau trosglwyddadwy y mae galw mawr amdanyn nhw ymysg cyflogwyr. Gallai'r rhain gynnwys:

  • safbwyntiau rhyngwladol, Ewropeaidd a thrawsddiwylliannol wrth astudio’r gyfraith
  • gwytnwch a’r gallu i ymaddasu i wahanol ddiwylliannau
  • sgiliau iaith ac ymwybyddiaeth ddiwylliannol
  • annibyniaeth a chyfrifoldeb
  • sgiliau cymdeithasol a chyfathrebu
  • cyfathrebu rhyngddiwylliannol
Yn dibynnu ar y wlad rydych chi’n ei dewis, efallai y byddwch chi’n gallu dysgu iaith newydd neu loywi eich sgiliau iaith presennol.

Ble galla i astudio dramor?

Ar hyn o bryd, mae gan adran y gyfraith bartneriaethau astudio dramor gyda phrifysgolion ym Madrid (Sbaen), Prague (y Weriniaeth Tsiec), Munster (yr Almaen) a Florida (UDA). Mae’r astudiaethau’n cael eu cynnal yn y Saesneg.

Pwy all wneud cais a beth yw'r broses?

Gall myfyrwyr y gyfraith ar y rhaglen M100 wneud cais i astudio dramor yn eu hail flwyddyn. Cyflwynir ceisiadau ar ddiwedd semester 1 ym Mlwyddyn 2, a gwneir penderfyniadau yn gynnar yn y semester canlynol.

Bydd dewis gwneud blwyddyn dramor yn golygu y bydd eich gradd yn ymestyn o fod yn un 3 blynedd i un 4 blynedd.  Os bydd eich cais yn llwyddiannus, bydd eich gradd yn newid i fod yn ‘LLB yn y Gyfraith gyda blwyddyn yn astudio dramor’, a byddwch chi’n treulio'ch trydedd flwyddyn yn y brifysgol bartner, gan ddychwelyd i Gaerdydd ar gyfer eich pedwaredd flwyddyn a'ch blwyddyn olaf.