Cludiant cynaladwy

Mae ymchwil i gludiant cynaladwy yn ymwneud ag amryw ddulliau cludo isel eu carbon ynghyd ag isadeileddau cysylltiedig megis trydan a hydrogen i gynnal cyfundrefnau cyfredol a hwyluso cludiant y dyfodol.

Trosolwg

Mae allyriadau nwyon tŷ gwydr yn arwain at effeithiau byd-eang y dylai pawb geisio eu lleddfu. Mae Deddf Newid Hinsoddol 2008 yn datgan bod rhaid cwtogi ar allyriadau’r deyrnas hon o leiaf 80% erbyn 2050. Daw 21% o holl allyriadau nwyon tŷ gwydr y deyrnas trwy gludiant, a cherbydau ar y ffyrdd sy’n gollwng tua 92% o’r ganran honno.

Mae cludiant yn ategu ansawdd ein bywydau a’n gobeithion economaidd, a bydd yn hanfodol i lwyddiant y deyrnas. Y gamp fydd cadw’r ddysgl yn wastad rhwng dau beth sy’n ymddangos yn groes i’w gilydd gan roi i bobl a chwmnïau ragor o ddewisiadau isel eu carbon ynghylch pryd, ble a sut i deithio neu gludo nwyddau.

Mae posibiliadau pellgyrhaeddol o ran cwtogi ar ein hallyriadau, gan gynnwys:

cerbydau a threnau sy’n defnyddio trydan glân
dylunio awyrennau is eu carbon
sustemau gwahanol iawn ar gyfer rheoli gwybodaeth a thrafnidiaeth.

Bydd datblygiadau o’r fath yn ein galluogi i ddibynnu’n llai ar olew a nwyddau wedi’u mewnforio.

Mae’r gorchwylion ymestynnol hynny’n gysylltiedig â nifer o Heriau Mawr Strategaeth Ddiwydiannol y Deyrnas Gyfunol sy’n anelu at wneud y gorau o’r manteision i’r deyrnas yn sgîl y symud byd-eang i dwf glân, a rôl flaenllaw’r deyrnas hon ynglŷn â dylanwadu ar natur symudedd y dyfodol.

Nodau

Mae’n hymchwilwyr yn ystyried pob rhan o’r gyfundrefn. Rydyn ni’n astudio’r hyn sy’n sbarduno newid yn nhrefn ein cludiant megis arloesi technegol, anghenion symudedd unigol a gofynion economaidd dros newid ynghyd â phryderon amgylcheddol a chymdeithasol o ran cynaladwyedd. At hynny, mae angen ystyried rôl ac effaith polisïau a rheoliadau cwtogi ar allyriadau ac a fydd ein cymdeithas yn barod i’w derbyn.

Mae’r ffordd gyfun hon yn ymwneud â gorchwylion y tymor byr, canolig a hir megis trefn y cyflenwi, isadeiledd gwefru’r dyfodol a thechnolegau cysylltiedig ar gyfer cerbydau.

Meysydd ymchwil

Un o brif nodweddion y thema hon yw’r ffordd amlddisgyblaethol o ddatblygu cludiant cynaladwy mewn amryw feysydd megis:

awyrofod
cerbydau modur
rheilffyrdd
isadeileddau
tanwyddau amgen: biodanwyddau cynaladwy
hyrwyddo dewisiadau is eu carbon
defnyddio mecanweithiau marchnadoedd i annog pobl i ddefnyddio cludiant is ei garbon.

Cyfleoedd ar gyfer myfyrwyr PhD

Rydym wedi cael dyfarniad Hwb Hyfforddiant Doethurol Rhyngddisgyblaethol mewn Trafnidiaeth Gynaliadwy. Golyga hyn y bydd rhaglen unigryw ar gael fydd yn cynnig dealltwriaeth holistig o'r diwydiant trafnidiaeth yn ei gyfanrwydd, yn ogystal â sawl PhD a ariennir yn llawn gyda mwy o gyflog i fyfyrwyr cymwys.