Senedd Cofnodion 8 Tachwedd 2023

Cofnodion cyfarfod Senedd Prifysgol Caerdydd a gynhaliwyd ddydd Mercher 8 Tachwedd 2023 am 14.15, yn Narlithfa Hadyn Ellis.

Presenoldeb

Yn Bresennol

Dr Martin Chorley, Katy Dale (cofnodion), Hannah Darnley, Dr Rob Davies, Anita Edson, Rhodri Evans (Ysgrifennydd Dros Dro), Kate Gilliver [o Gofnod 1042], Yr Athro Claire Gorrara, Dr Rob Gossedge, Yr Athro Kerry Hood, Rashi Jain, Julie-Anne Johnston, Sue Midha, Yr Athro Wyn Morgan, TJ Rawlinson, Claire Sanders, Dr Henrietta Standley, Yr Athro Amanda Tonks, Yr Athro Jason Tucker, Yr Athro Karin Wahl-Jorgensen [tan Gofnod 1043], Darren Xiberras

1031 Croeso a chyflwyniadau

Nodwyd

1031.1 croesawodd y Cadeirydd bawb i'r cyfarfod, yn enwedig yr aelodau hynny a oedd yn ymuno â’r cyfarfod am y tro cyntaf;

1031.2 croesawodd y Cadeirydd hefyd yr Athro Wyn Morgan o Halpin, a oedd yn arsylwi'r cyfarfod yn rhan o’r Adolygiad Dwysiambr, a Julie-Anne Johnston, y Prentis-Lywodraethwr ar y Cyngor.

1032 Ymddiheuriadau am absenoldeb

Nodwyd

1032.1 byddai'r ymddiheuriadau a dderbyniwyd yn cael eu cofnodi yn y cofnodion.

1033 Datgan buddiannau

Atgoffodd y Cadeirydd yr aelodau o'r gofyniad iddynt ddatgelu unrhyw fuddiannau ariannol uniongyrchol neu anuniongyrchol a allai ddylanwadu ar eu barn. Dylid datgelu buddiannau cyn i eitem gael ei drafod, a dylai’r unigolyn dan sylw naill ai adael y cyfarfod neu beidio â chymryd rhan yn y drafodaeth, fel y bo’n briodol ar gyfer y rhan honno o’r agenda.

Nodwyd

1033.1 ni wnaeth unrhyw aelod ddatgelu unrhyw fuddiannau.

1034 Cofnodion y cyfarfod blaenorol

Cadarnhawyd cofnodion y cyfarfod a gynhaliwyd ar 7 Mehefin 2023 (papur 22/858) fel cofnod gwir a chywir ac fe’u cymeradwywyd i gael eu llofnodi gan y Cadeirydd.

1035 Materion yn codi

Nodwyd nad oedd unrhyw faterion yn codi.

1036  Cyfansoddiad ac Aelodaeth

Derbyniwyd ac ystyriwyd papur 23/225 – ‘Cyfansoddiad ac Aelodaeth’. Siaradodd y Cadeirydd am yr eitem hon.

Penderfynwyd

1036.1 adolygu a allai Prif Weithredwr Undeb y Myfyrwyr fynychu cyfarfodydd y Senedd.

1037 Cyfansoddiad ac aelodaeth yr is-bwyllgorau

Derbyniwyd ac ystyriwyd papur 23/162 'Cylch Gorchwyl y Pwyllgor Cymrodoriaethau a Graddau er Anrhydedd'. Siaradodd y Cadeirydd am yr eitem hon.

Penderfynwyd

1037.1 cymeradwyo'r cyfansoddiad diwygiedig ar gyfer y Pwyllgor Cymrodoriaethau a Graddau er Anrhydedd.

1038 Eitemau gan y Cadeirydd

Derbyniwyd ac ystyriwyd papur 23/226C 'Adroddiad am Gamau Gweithredu'r Cadeirydd Ers y Cyfarfod Diwethaf'. Siaradodd y Cadeirydd am yr eitem hon.

Nodwyd

1038.1 bod yr Is-Ganghellor blaenorol wedi cymeradwyo’r eitemau;

Sefydlu cronfa waddol ar gyfer Athro Seiciatreg Hodge

1038.2 y datblygwyd Athro Seiciatreg Hodge i ariannu rhagor o ymchwil ym maes seiciatreg fanwl ac ymyrraeth seiciatreg mewn cymdeithas; roedd hyn yn gysylltiedig â'r GIG a chyflwyno gwasanaethau;

Cymeradwyo Amrywiad ar gyfer Myfyrwyr sydd â Chanlyniad Cynnydd wedi’i Ohirio

1038.3 bod hysbysu myfyrwyr a oedd yn aros am eglurhad ynghylch y trefniadau ar gyfer symud ymlaen i gam nesaf y rhaglen yn 2023/24 wedi bod yn fater brys a phwysig;

1038.4 bod yr atodiad yn nodi'n anghywir gais am gymeradwyaeth y Senedd; eitem i'w nodi oedd hon gan ei bod wedi'i chymeradwyo drwy weithred y Cadeirydd;

1038.5 y dylai myfyrwyr a oedd wedi cael caniatâd i symud ymlaen heb gael canlyniadau rhai modiwlau, ac y bu'n ofynnol iddynt ailsefyll wedi hynny, gael cyngor academaidd fesul achos i benderfynu ar yr opsiwn mwyaf priodol ar eu cyfer.

1039 Adroddiad gan yr Is-Ganghellor

Derbyniwyd ac ystyriwyd papur 23/227C 'Adroddiad yr Is-Ganghellor i'r Senedd'. Siaradodd y Cadeirydd am yr eitem hon.

Nodwyd

1039.1 bod yr Is-Ganghellor yn diolch i bawb a oedd wedi cyfrannu at y Sgwrs Fawr hyd yn hyn, ac am y cyfraniadau a'r ymgysylltu parhaus; y bwriad oedd dechrau creu opsiynau strategol a’u hadolygu ar gyfer y dyfodol ym misoedd cyntaf 2024;

1039.2 bod amrywiaeth ac ansawdd y gwaith sy'n cael ei wneud ym mhob rhan o’r Brifysgol wedi creu argraff ar yr Is-Ganghellor;

1039.3  bod llwyddiant ymchwil wedi'i nodi yn yr adroddiad ac fe holwyd a oedd modd buddsoddi ymhellach yn y maes hwn; nododd yr Is-Ganghellor nad oedd arian ychwanegol ar gael a bod angen blaenoriaethu; byddai buddsoddiad newydd mewn un maes yn digwydd ar draul maes arall ac roedd y Sgwrs Fawr yn allweddol yn hyn o beth i nodi sut mae’r Brifysgol am edrych yn y dyfodol a pha weithgareddau oedd yn flaenoriaethau;

1039.4 y gofynnwyd a oedd modd cynnal arolwg o’r diwylliant addysgu, o ystyried ei bwysigrwydd i'r Brifysgol; nodwyd nad tasg rhwydd yw diffinio diwylliant addysgu, felly efallai nad oedd yn addas ar gyfer arolwg, ond croesawyd syniadau ar sut i symud hyn ymlaen; roedd angen hefyd ystyried diwylliant mewn modd cyfannol ochr yn ochr â gwerthoedd y sefydliad.

1040 Safbwynt y Myfyrwyr – ymateb y brifysgol

Cyflwynwyd ac ystyriwyd papur 23/228, 'Ymateb i Safbwyntiau’r Myfyrwyr 2023’. Siaradodd y Rhag Is-ganghellor Addysg a Phrofiad Myfyrwyr am yr eitem hon.

Nodwyd

1040.1 bod y Senedd wedi derbyn y tair dogfen Safbwynt y Myfyrwyr a gyflwynwyd yn 2023 yn ei gyfarfod ym mis Mehefin;

1040.2 bod y papur hwn yn cynnwys ymateb y Brifysgol i'r Safbwyntiau hyn, yn ogystal â manylion cyflawniadau mewn ymateb i Safbwynt y Myfyrwyr 2022 (a’r rhai y bu cynnydd sylweddol yn eu herbyn);

1040.3 y diolchwyd i Undeb y Myfyrwyr am eu partneriaeth a'u cefnogaeth barhaus wrth ddatblygu camau gweithredu y cytunwyd arnynt;

1040.4 y byddai llywodraethu Safbwyntiau o ran Tai, ac Ystadau a Chyfleusterau yn rhan o waith Grŵp Bywyd y Myfyrwyr a Bwrdd y Gwasanaethau Proffesiynol, a byddai'r Grŵp Ailfeddwl Asesu yn goruchwylio’r Safbwynt o ran Asesu ac Adborth;

1040.5 bod Undeb y Myfyrwyr yn diolch i'r Rhag Is-Ganghellor Addysg a Phrofiad y Myfyrwyr am y gwaith cydweithredol yn y maes hwn a nododd:

.1 fod y cynnydd dymunol o ran Safbwynt y Myfyrwyr 2022 a’r amseroedd agor y campws y gofynnwyd amdanynt yn cael eu gwneud yn gyson ar draws oriau agor anhraddodiadol (er enghraifft agor Canolfan Bywyd y Myfyrwyr ar benwythnosau Wythnos y Glas); cadarnhaodd y Prif Swyddog Gweithredu fod defnydd isel o adeiladau yn cael ei adolygu ac y byddai'r uchod yn cael ei ystyried;

.2 y byddai'n fuddiol cynnwys proses ddilysu ar gyfer y gwaith Marcio ac Asesu i fel bod y gwaith yn cael ei wneud yn yr un modd ar draws pob ysgol;

.3 bod Undeb y Myfyrwyr wedi bod yn rhan o sgyrsiau am dai myfyrwyr ond bod myfyrwyr yn parhau i wynebu heriau o ran dod o hyd i lety addas, a byddai'n fuddiol mabwysiadu ymagwedd traws-ddinas, i wneud yn siŵr bod prifysgolion yn cydweithio i roi llety i bawb; cadarnhaodd y Prif Swyddog Gweithredu fod cytundeb ar waith gydag Unite i gaffael rhagor o lety ond roedd yn cytuno bod angen ystyried hyn mewn modd cyfannol ar draws y ddinas; roedd Strategaeth Preswylfeydd yn cael ei datblygu;

.4 bod ystafell weddïo ychwanegol wedi'i nodi ym Mharc y Mynydd Bychan ond mae yn yr un adeilad â'r ystafell bresennol, felly mae’n bosibl y byddai adeilad arall yn fwy dymunol; cadarnhawyd bod gwaith yn mynd rhagddo i fapio ystafelloedd gweddïo ar draws y campws a nodi lleoliadau addas eraill; roedd gwaith hefyd ar y gweill gyda TG i gynnwys lleoliadau ystafelloedd gweddïo yn ap y myfyrwyr;

.5 bod gan Barc y Mynydd Bychan y gyfran waethaf o ran faint o le sydd ar gael i fyfyrwyr astudio, ac y dylid adolygu hyn; amlygwyd bod safle Parc y Mynydd Bychan yn cael ei rannu â'r GIG a bod hyn yn gosod rhai cyfyngiadau ar faint o le sydd ar gael;

1040.6  bod adborth penodol gan fyfyrwyr yn cael ei gynnwys yn Safbwynt y Myfyrwyr a bod ymateb y Brifysgol wedi'i ddrafftio yn yr un modd ar lefel uwch; nodwyd pryder felly bod yr argymhellion yn Safbwynt y Myfyrwyr a sut caiff y rhain eu rhoi ar waith, yn cael eu cytuno o’r brig i lawr yn hytrach nag ar lefel leol; roedd gofyniad rheoliadol i'r Brifysgol ddarparu ymateb sefydliadol i adborth blynyddol Undeb y Myfyrwyr, felly mae angen mewnbwn ar lefel rheolwyr; roedd disgwyl y byddai adborth ar argymhellion Safbwynt y Myfyrwyr yn cael ei rannu drwy Fyrddau Astudiaethau, Paneli Myfyrwyr Staff, a Phwyllgorau Addysg a Phrofiad Myfyrwyr Colegau ac Ysgolion a bod yr eitem ddiweddarach ar yr Adolygiad Llywodraethu Addysg yn nodi bod angen gwella’r llif hwn o wybodaeth.

Penderfynwyd

1040.7 cynnwys y Cyfarwyddwr Ystadau mewn cyfarfod partneriaeth misol rhwng Undeb y Myfyrwyr a'r Brifysgol, i drafod y materion ystadau a nodwyd yn 1040.5.4 a 1040.5.5;

1040.8  argymell i'r Cyngor yr ymateb i Safbwyntiau’r Myfyrwyr ar gyfer 2023.

1041 Canlyniadau Arolwg Cenedlaethol y Myfyrwyr

Derbyniwyd ac ystyriwyd adroddiad llafar gan y Rhag Is-Ganghellor Addysg a Phrofiad Myfyrwyr.

Nodwyd

1041.1 ei bod yn bwysig rhannu manylion canlyniadau Arolwg Cenedlaethol y Myfyrwyr â’r Senedd, o ystyried ei rôl yn cynghori'r Cyngor a’r cyfrifoldeb sydd ganddi dros faterion academaidd a materion sy’n ymwneud â phrofiad y myfyrwyr;

1041.2 bod Arolwg Cenedlaethol y Myfyrwyr wedi'i lansio yn 2005 a'i fod yn arolwg o holl israddedigion y DU; felly, mae’n adlewyrchu'r darlun cenedlaethol o brofiad myfyrwyr ac mae rheoleiddwyr yn ei ddefnyddio fel ffon fesur gynrychiadol o brofiad myfyrwyr; mae hefyd yn effeithio ar safleoedd mewn tablau cynghrair;

1041.3 ei bod yn bwysig ystyried cyfraddau ymateb wrth adolygu’r canlyniadau a bod y gyfradd ymateb gyffredinol wedi cynyddu i 71% yn 2023;

1041.4 bod yr arolwg wedi’i ddiwygio ar gyfer 2023, gyda’r ateb canolog niwtral wedi’i ddileu, iaith fwy emosiynol wedi’i defnyddio a chwestiwn wedi’i ychwanegu am les meddwl; roedd y sgôr ar gyfer boddhad cyffredinol wedi'i dileu hefyd ar gyfer sefydliadau yn Lloegr ond mae yno o hyd ar gyfer gwledydd eraill yn y DU;

1041.5 bod ymatebwyr i arolwg eleni wedi dechrau addysg uwch yn 2020 yn ôl pob tebyg a bod Covid, gweithredu diwydiannol a’r argyfwng costau byw wedi effeithio arnynt yn ystod y cyfnod hwn;

1041.6 mai dyma brif benawdau’r canlyniadau:

.1 bod y canlyniadau wedi peri siom i’r Brifysgol ac nad oedd y rhain yn adlewyrchu ymdrechion ar draws y sefydliad yn y maes hwn;

.2 bod sgôr y Brifysgol yn is na chyfartaledd y sector ar bob lefel o ran boddhad myfyrwyr, a’i bod wedi methu â gwrthdroi’r dirywiad a welwyd dros y blynyddoedd blaenorol;

.3 bod 25 o 62 o bynciau wedi gwella o ran boddhad cyffredinol, a bod gwelliant o dros 10% mewn 7 pwnc, a oedd yn braf i’w weld; fodd bynnag, bu gostyngiad mewn 34 o bynciau, a hynny o dros 10% mewn 8 pwnc:

.4 mai Undeb y Myfyrwyr yw’r dangosydd perfformiad uchaf o hyd;

.5 bod rhai themâu yn gwella ond ar gyfradd arafach o’i chymharu â'r sector yn gyffredinol;

.6 bod 16 dangosydd yn is na’r meincnod yn ystadegol;

1041.7 bod y Brifysgol, o'i chymharu â'r sector, yn tanberfformio yng nghyd-destun Cymru, Grŵp Russell a ledled y DU, a bod angen gwella hyn;

1041.8  mai’r Brifysgol erbyn hyn, yn sgîl canlyniadau'r Arolwg, yw’r sefydliad a reoleiddir fwyaf yng Nghymru oherwydd y monitro ychwanegol, a bod 50% o ysgolion yn cael eu monitro gan CCAUC; ychwanegodd hyn lefel uchel o faich rheoleiddio gan fod yr angen i ymateb eleni wedi cyd-daro â dechrau'r flwyddyn academaidd, o ganlyniad i’r oedi wrth gyhoeddi canlyniadau'r Arolwg; diolchwyd i bawb a chwaraeodd ran wrth ymateb i ganlyniadau'r arolwg;

1041.9 bod canlyniadau'r Arolwg wedi arwain at risg sefydliadol uchel y bydd y ddarpariaeth academaidd yn annigonol (fel y'i diffinnir gan CCAUC) a bod y Brifysgol wedi cyflwyno cynllun sefydliadol i ddangos sut y byddai’n mynd i'r afael â'r risg hon;

1041.10 bod cynlluniau cymorth ar gyfer ysgolion yn cael eu paratoi hefyd i’w helpu i roi cynlluniau ysgolion ar waith;

1041.11 bod y gwaith i fynd i'r afael â chanlyniadau'r Arolwg yn ystyried y Brifysgol gyfan ac yn cynnwys Gwasanaethau Proffesiynol, felly nid mater i staff academaidd yn unig yw hwn;

1041.12 bod canlyniadau cryf o ran deilliannau graddedigion a pherfformiad REF wedi golygu bod safleoedd y Brifysgol yn y tablau cynghrair wedi aros yn gyson, ond mae disgwyl i ganlyniadau siomedig yr Arolwg ddechrau effeithio ar safleoedd y Brifysgol ac ar recriwtio myfyrwyr;

1041.13 bod llawer iawn o waith eisoes wedi'i wneud i wella sgorau yn yr Arolwg, gan gynnwys (ymhlith pethau eraill): datblygu staff addysgu; cau'r ddolen adborth; adolygu cymorth tiwtoriaid personol; adolygu modelau gwasanaeth; a chymorth lles;

1041.14 mai dim ond un ffordd o fesur o brofiad myfyrwyr yw’r Arolwg, er ei fod yn bwysig;

1041.15 y dylai effaith covid ar garfannau o fyfyrwyr leihau yn y dyfodol ac y bydd canlyniadau’r Arolwg, gyda lwc, yn adlewyrchu hyn;

1041.16 bod gwaith wedi’i wneud i rannu arferion gorau’r ysgolion sy’n perfformio'n dda ond roedd hyn yn aml yn berthnasol i ysgolion penodol a phynciau â charfannau bach;

1041.17 ei bod yn hanfodol sicrhau bod y ddarpariaeth fugeiliol a gynigir i fyfyrwyr yn gydlynol ar draws y Brifysgol; mae cyfathrebu â myfyrwyr a’u cyfeirio yn hanfodol yma hefyd, beth bynnag fo’u hysgol neu ddisgyblaeth;

1041.18 bod y canlyniadau'n awgrymu nad oedd y Brifysgol wedi adfer cystal â’r sector ar ôl y pandemig, a bod cyflymder y gwelliant yn araf;

1041.19  bod Undeb y Myfyrwyr wedi croesawu gwahoddiadau diweddar i ymweld ag ysgolion ac adolygu sut i adeiladu cymuned a gwneud i’r myfyrwyr deimlo eu bod yn perthyn iddi;

1041.20 y dylid ystyried llwyth gwaith staff hefyd; pwysleisiwyd mai profiad y myfyrwyr ddylai fod yn sail i'r holl weithgarwch, felly mae'n bosibl y bydd angen gwneud llai o rai gweithgareddau neu roi’r gorau iddynt er mwyn gwneud yn siŵr bod hyn yn digwydd.

1042 Adroddiad Ansawdd Blynyddol

Derbyniwyd ac ystyriwyd papur 23/189R, 'Adroddiad Ansawdd Blynyddol 2022-23'. Siaradodd y Rhag Is-ganghellor Addysg a Phrofiad Myfyrwyr am yr eitem hon.

Nodwyd

1042.1 bod yr adroddiad yn cynnwys trosolwg o'r system ansawdd flynyddol a'i gweithrediad er mwyn sicrhau gwelliant parhaus;

1042.2 cadarnhaodd yr adroddiad hefyd fod safonau’r dyfarniadau'n cael eu gosod a'u cynnal yn briodol a bod y Brifysgol yn cymryd camau i fynd i'r afael â phryderon ynghylch profiad y myfyrwyr;

1042.3 bod adran 6.4 yn ymdrin â'r adroddiad archwilio mewnol ar y broses hysbysu canlyniadau y gofynnwyd amdani yn dilyn Adroddiad Ansawdd Blynyddol 2021/22; roedd yr adroddiad archwilio wedi rhoi peth sicrwydd ac roedd Grŵp Gorchwyl a Gorffen wedi'i sefydlu i fwrw ymlaen ag argymhellion y rheolwyr; roedd hwn yn ddarn sylweddol o waith, ac fe gymeradwyodd y Bwrdd Gweithredol achos busnes ar gyfer Prosiect Prosesu Marciau ym mis Hydref 2023; byddai'r prosiect yn parhau tan 2025/26 a bydd rhaid cyflawni nifer o elfennau yn y flwyddyn gyntaf i roi sicrwydd;

1042.4 bod data anghyflawn ar gyfer 2022/23 yn adrannau 4.2 a 4.3 (Canlyniadau Gradd) oherwydd boicot marcio ac asesu (MAB) a oedd wedi peri i ganlyniadau cynnydd a dyfarniadau gael eu gohirio; bydd adolygiad pellach yn cael ei gynnal cyn diwedd 2023 i ddarparu datganiad wedi'i ddiweddaru am ddeilliannau gradd a data i lenwi’r bylchau dyfarnu, ac y byddai gofyn i'r Senedd eu hadolygu maes o law; roedd yn braf nodi nad oedd arholwyr allanol wedi codi unrhyw bryderon ynghylch safonau academaidd dyfarniadau;

1042.5 bod nifer o ffactorau yn effeithio ar y bwlch dyfarnu a bod y Brifysgol yn edrych ar y maes hwn yn fanwl i wneud yn siŵr bod adnoddau a chefnogaeth ar ei gyfer drwy'r prosiect Addysg Gynhwysol;

1042.6 roedd gwaith da wedi'i wneud ynghylch deallusrwydd artiffisial (AI) ac roedd canllawiau wedi'u cyhoeddi; teimlad presennol y sector oedd parhau i archwilio asesiadau amgen a oedd yn ategu cywirdeb academaidd yn hytrach na dychwelyd i arholiadau ysgrifenedig traddodiadol;

1042.7 ei bod yn ofynnol i'r Brifysgol adrodd i Gomisiynydd y Gymraeg am unrhyw gwynion yn ymwneud â'r Gymraeg; credwyd bod y rhain wedi'u cynnwys yn yr Adroddiad Cwynion Blynyddol a dderbyniwyd gan y Bwrdd Gweithredol ac y dylid ystyried eu cynnwys yn yr Adroddiad Ansawdd Blynyddol (AQR);

1042.8 y croesawyd bod profiad myfyrwyr ôl-raddedig wedi’i gynnwys yn yr adroddiad.

Penderfynwyd

1042.9 adolygu sut mae cwynion am y Gymraeg yn cael eu cynnwys yn yr adroddiad;

1042.10 y byddai’r Rhag Is-Ganghellor Addysg a Phrofiad Myfyrwyr yn trafod cynrychiolaeth myfyrwyr ôl-raddedig ar fyrddau/grwpiau gydag Is-lywydd y Myfyrwyr Ôl-raddedig (Addysg a Lles);

1042.11 argymell i’r Cyngor gymeradwyo’r Adroddiad Ansawdd Blynyddol a bod yr adroddiad yn cael ei ddefnyddio fel sail ar gyfer y datganiadau sicrwydd sy'n ymwneud â safonau academaidd ac ansawdd profiad y myfyrwyr a gyflwynir gan y Cyngor i CCAUC.

1043 Adroddiad y Pwyllgor Safonau ac Ansawdd Academaidd i'r Senedd

Derbyniwyd papur 23/229 'Adroddiad y Pwyllgor Safonau ac Ansawdd Academaidd'. Siaradodd y Rhag Is-ganghellor Addysg a Phrofiad Myfyrwyr am yr eitem hon.

Nodwyd

1043.1 bod yr adroddiad yn adlewyrchu cyfarfodydd y Pwyllgor Safonau ac Ansawdd Academaidd a gynhaliwyd ym mis Gorffennaf a mis Hydref;

1043.2 y byddai Grŵp Gorchwyl a Gorffen yn cael ei sefydlu i adolygu cydymffurfiaeth â'r diwygiadau a gyhoeddwyd yn ddiweddar i gyngor cyfraith defnyddwyr;

1043.3  bod arolwg wedi'i gynnal ynghylch asesiadau gwaith grŵp a byddai canllawiau ar hyn i ddilyn; nodwyd bod gweithio mewn grwpiau wedi'i adolygu yn yr Ysgol Busnes a gallai fod canllawiau defnyddiol i'w rhannu'n ehangach o ganlyniad i hyn;

Polisi Marcio a Chymedroli

1043.4 bod y papur yn cyflwyno Polisi Marcio a Chymedroli wedi'i ddiweddaru i'w gymeradwyo gan y Senedd; Dr Kate Gilliver oedd wedi arwain y gwaith hwn; nodwyd bod y fersiwn a roddwyd i'r Senedd yn cynnwys rhai gwallau teipio a fformatio a fyddai'n cael eu cywiro;

1043.5 y cafwyd adborth cyson gan arholwyr allanol ynghylch anghysondebau wrth gymedroli; cwestiynau yn Arolwg Cenedlaethol y Myfyrwyr ynghylch asesu a marcio oedd yr ail ffactor a ysgogodd y polisi diwygiedig;

1043.6 bod ymchwil wedi'i chynnal ar sut y rheolir marcio a chymedroli yn y sector, ochr yn ochr ag adborth gan arholwyr allanol a myfyrwyr;

1043.7 roedd y polisi'n cynnwys newid i gymedroli cyn marcio gan mai dyma’r arfer gorau yn y sector; roedd pryder y gallai hyn arwain at lwyth gwaith ychwanegol, ond roedd yr ysgolion lle'r oedd hyn eisoes yn digwydd wedi canfod ei fod wedi lleihau'r amser a gymerir i gymedroli gan fod cyd-ddealltwriaeth cyn dechrau marcio;

1043.8 y byddai'r polisi ar waith o fis Medi 2024 er mwyn caniatáu i waith gael ei wneud gydag ysgolion er mwyn ei gyflwyno; nodwyd bod llawer o ysgolion eisoes yn cyd-fynd â'r polisi diwygiedig;

1043.9  bod gwaith a oedd wedi’i wneud ynghylch gwaith cwrs rhy faith wedi bod yn heriol ac er gwaethaf ymgynghori, ni chafwyd cytundeb ar sut i reoli hyn (gwelwyd dulliau amrywiol yn y sector); cytunwyd felly y byddai'r dull gweithredu sydd yn y polisi gwreiddiol yn parhau; nodwyd bod arholwyr allanol wedi mynegi pryderon nad oedd y dull presennol yn briodol, felly byddai’r arfer gorau ar weithredu'r dull yn cael ei rannu ag ysgolion i sicrhau bod y polisi'n cael ei roi ar waith yn gyson ac, os oedd pryderon yn parhau, dylai'r Senedd adolygu'r dull o dan sylw;

1043.10 y byddai'n fuddiol adolygu'r geiriad i egluro beth yw’r polisi (yr hyn sy’n rhaid ei wneud) a beth yw canllaw (yr hyn y dylid ei wneud);

1043.11 bod rhai problemau wedi codi wrth gymedroli rhaglenni cydanrhydedd gan fod gwahanol ddulliau'n cael eu mabwysiadu ar draws ysgolion; awgrymwyd y dylid adolygu hyn wrth roi ar waith mewn ymarfer gweithredu a gwersi a ddysgwyd;

1043.12 y byddai'n ddefnyddiol nodi'r dehongliad o “lle bynnag y bo modd” mewn perthynas ag anhysbysrwydd (adran 2.4), oherwydd efallai na fydd hyn yn bosibl mewn sefyllfaoedd os oes nifer cyfyngedig yn meddu ar arbenigedd; nodwyd y gallai hwn fod yn faes da i'w adolygu mewn ymarfer sy’n ystyried y gwersi a ddysgwyd.

Penderfynwyd

1043.13 cymeradwyo'r Polisi Marcio a Chymedroli, yn amodol ar rannu copi glân o'r ddogfen â'r Senedd.

1044 Adroddiad y Pwyllgor Addysg a Phrofiad Myfyrwyr i'r Senedd

Derbyniwyd papur 23/230 'Adroddiad y Pwyllgor Addysg a Phrofiad Myfyrwyr'. Siaradodd y Rhag Is-ganghellor Addysg a Phrofiad Myfyrwyr am yr eitem hon.

Nodwyd

1044.1 bod Safbwynt Myfyrwyr 2022 wedi gofyn am newid i recordiadau o ddarlithoedd a bod y Brifysgol wedi ymrwymo i ryddhau recordiadau darlithoedd yn awtomatig am 5 diwrnod, yn amodol ar ymgynghori ag Undebau Llafur a pharatoi canllawiau gweithredu;

1044.2 bod y Pwyllgor wedi gwneud mân ddiwygiad i'w Gylch Gorchwyl i gywiro enw'r Grŵp Dyfodol Myfyrwyr Llwyddiannus.

1045 Diweddariad ar yr adolygiad dwysiambr

Derbyniwyd ac ystyriwyd adroddiad llafar gan y Dirprwy Is-Ganghellor.

Nodwyd

1045.1 bod y Cyngor wedi comisiynu Adolygiad o Effeithiolrwydd Llywodraethu yn 2021 (adroddiad Nicholls); ar sail yr argymhellion yn yr adroddiad hwn, roedd y Cyngor wedi comisiynu adolygiad o'r berthynas rhwng y Cyngor a'r Senedd i sicrhau ei bod mor effeithiol â phosibl rhwng y cyrff, yn ogystal â’r byrddau eraill sy'n bwydo i mewn i'r cyrff hyn;

1045.2 y gelwir hwn yr adolygiad dwysiambr a byddai'n edrych ar feysydd megis y berthynas gyfansoddiadol, sut cafodd barn rhanddeiliaid ei cheisio a’i hystyried, a sut y rhoddwyd sicrwydd academaidd;

1045.3 bod Grŵp Gorchwyl a Gorffen (dan gadeiryddiaeth y Dirprwy Is-Ganghellor) wedi'i sefydlu i oruchwylio'r adolygiad; Halpin fydd yn cynnal yr adolygiad;

1045.4 bod yr adolygiad yn y cam casglu gwybodaeth ar hyn o bryd a bod Halpin yn cwrdd â rhanddeiliaid allweddol, gan gynnwys aelodau'r Senedd, aelodau'r Cyngor a'r rhai ar y Bwrdd Astudiaethau/Colegau a’r Pwyllgorau Addysg Ysgolion a Phrofiad Myfyrwyr;

1045.5 y byddai’r adroddiad drafft yn cael ei gyhoeddi ddiwedd Ionawr 2024, cyn cael ei rannu â'r Bwrdd Gweithredol, y Pwyllgor Llywodraethu, y Senedd a'r Cyngor.

1046 Diweddariad ar yr adolygiad llywodraethu addysg

Derbyniwyd ac ystyriwyd papur 23/240 'Adolygiad Llywodraethu Addysg'. Siaradodd y Rhag Is-ganghellor Addysg a Phrofiad Myfyrwyr am yr eitem hon.

Nodwyd

1046.1 bod y trefniadau newydd ar gyfer llywodraethu addysg wedi dod i rym o 2021/22 a bod adolygiad wedi'i addo o sut maent yn cael eu gweithredu;

1046.2 bod yr adolygiad wedi'i gynnal ym mis Medi a mis Hydref 2023 a'i fod wedi cynnwys arolwg staff; byddai'r adolygiad hwn yn cael ei rannu â Halpin hefyd i fod yn rhan o'r Adolygiad Dwysiambr;

1046.3 mai dyma’r prif ddeilliannau:

.1 cymorth i staff ac eglurder ynghylch rolau'r pwyllgorau, gan gynnwys nodi unrhyw orgyffwrdd;

.2  dull mwy systematig i lif y wybodaeth drwy'r system i wneud yn siŵr bod staff yn ymwybodol o benderfyniadau; roedd hyn yn arbennig o wir o ran y llif yn ôl ac ymlaen i’r Byrddau Astudiaethau a nodwyd bod angen ymgynghori ac ymgysylltu â nhw’n fwy rheolaidd;

.3 adolygu cynrychiolaeth myfyrwyr ar bwyllgorau;

.4  adolygu Paneli Myfyrwyr-Staff a'u perthynas â Byrddau Astudiaethau;

1046.4  yr holwyd a ellir cynnwys cyflogi a hyfforddi tiwtoriaid ôl-raddedig yn rhan o gylch gorchwyl Pwyllgorau Addysg Ôl-raddedig a Phrofiad Myfyrwyr y Coleg; nodwyd y byddai'r Rhag Is-ganghellor Addysg a Phrofiad Myfyrwyr a'r Cyfarwyddwr Adnoddau Dynol yn rhoi ystyriaeth bellach o ran y lle gorau i drafod y materion hyn.

Penderfynwyd

1046.5 cymeradwyo'r newidiadau i'r Rheoliadau Rheoli Academaidd.

1047 Rhaglen cefnogi rhagoriaeth ymchwil

Derbyniwyd ac ystyriwyd papur 23/231 'Cefnogi Rhagoriaeth Ymchwil – Blaengynllunio ar gyfer Blwyddyn Academaidd 2023-24'. Siaradodd y Rhag Is-ganghellor Ymchwil, Arloesedd a Menter am yr eitem hon.

Nodwyd

1047.1 bod y rhaglen wedi'i sefydlu y llynedd gyda'r nod o ddiwygio arferion a gweithdrefnau ymchwil da a sicrhau cynllunio systematig a threfnus ar gyfer REF yn y dyfodol;

1047.2 bod y fframwaith wedi'i gynnwys yn y papur; byddai hwn yn cael ei rannu â Chyfarwyddwyr Ymchwil a Byrddau Colegau i benderfynu ar y cyfeiriad ar gyfer y dyfodol;

1047.3 bod ymgysylltu â Phenaethiaid Ysgolion a Chyfarwyddwyr Ymchwil wedi rhoi persbectif ar sefyllfa bresennol y Brifysgol a’r meysydd fydd yn flaenoriaeth i’r ysgolion yn y dyfodol; roedd ymrwymiad cryf ar lefel ysgolion i symud y rhaglen yn ei blaen ac roedd rhai ysgolion eisoes wedi adolygu hyn yn annibynnol; byddai rhaglen ymgysylltu i nodi cynnydd yn erbyn camau gweithredu yn ystod Gwanwyn 2024;

1047.4 bod gan y Brifysgol lawer o feysydd ymchwil o safon ryngwladol;

1047.5 bod y rhaglen yn rhoi pobl yn gyntaf ac y byddai'n adolygu mecanweithiau a diwylliant i sicrhau arferion gorau; roedd yr Athro Karin Wahl-Jorgensen wedi cynnal arolwg o ddiwylliant ymchwil a'i arwain;

1047.6 bod angen adolygu effaith ymchwil ar draws y sefydliad ac alinio hyn â'r risgiau a'r cyfleoedd posibl yn y maes hwn;

1047.7 mai ansawdd ymchwil oedd y ffocws a'r flaenoriaeth yn hytrach na mynd ar drywydd REF er ei fwyn ei hun; nodwyd bod sgyrsiau am REF a'i ddyfodol yn cael eu cynnal yn y sector a bod angen bod yn effro i newidiadau posibl mewn cyflwyniadau yn y dyfodol; nodwyd bod angen adolygu allbynnau ymchwil y Brifysgol o ystyried pa mor bell y maent o gyfartaledd Grŵp Russell;

1047.8 bod perchnogaeth leol yn allweddol; bod camau gweithredu wedi'u nodi ar lefel ysgolion a’r sefydliad.

1048 Newidiadau i Ordinhad 7

Derbyniwyd ac ystyriwyd papur 23/232 'Newidiadau i Ordinhad 7'. Siaradodd Ysgrifennydd y Brifysgol a’r Cwnsler Cyffredinol am yr eitem hon.

Nodwyd

1048.1 bod y Senedd wedi cael cais i wneud sylwadau ar aelodaeth arfaethedig y Senedd yn y Cyd-bwyllgor ac argymell i'r Cyngor;

1048.2 bod y Pwyllgor Llywodraethu wedi trafod aelodaeth y Cyngor o’r Cyd-bwyllgor yn ei gyfarfod ar 7 Tachwedd 2023 ac wedi argymell y dylai fod 2 aelod lleyg, un aelod allanol (Is-ganghellor, Profost neu swyddog cyfatebol o Sefydliad Addysg Uwch) ac un arall nad yw'n weithiwr na'n fyfyriwr;

1048.3 y byddai'r Cyd-Bwyllgor, ar ôl ei ffurfio, yn ffurfio un corff;

1048.4 bod rhestr aelodau'r Senedd wedi'i thrafod yng nghyfarfod y Senedd ym mis Mehefin 2022 a bod y papur yn edrych ar godeiddio penderfyniad y Senedd yn y cyfarfod hwnnw (ac fel yr adlewyrchwyd mewn fersiynau blaenorol o'r Cyd-bwyllgor); byddai hyn yn helpu i sefydlu Cydbwyllgor yn gyflym pan fyddai angen;

1048.5 bod y dull ethol ym mhob categori yn golygu mai dim ond y rhai cymwys yn y categori hwnnw y gellid eu henwebu a dim ond y rhai yn y categori hwnnw a fyddai'n gallu pleidleisio pe bai angen pleidlais (e.e. dim ond Penaethiaid Ysgol fyddai'n gymwys o dan y categori Pennaeth Ysgol a dim ond Penaethiaid Ysgolion fyddai’n gallu pleidleisio yn y categori hwn).

Penderfynwyd

1048.6 argymell i’r Cyngor gymeradwyo’r newidiadau i Ordinhad 7.

1049  Strategaeth newydd llyfrgelloedd ac archifau 2023 - 2027

Derbyniwyd ac ystyriwyd papur 23/89 'Strategaeth Newydd Llyfrgelloedd ac Archifau 2023 – 2027'. Siaradodd Cyfarwyddwr Gwasanaethau Llyfrgelloedd y Brifysgol am yr eitem hon.

Nodwyd

1049.1 mewn ymateb i ymholiadau, cadarnhawyd y canlynol:

.1 bod y strategaeth newydd yn cynnwys thema trawsnewid ardaloedd ac yn ystyried y posibilrwydd o adeilad newydd; roedd cael llyfrgell newydd ar gampws Cathays yn uchelgais ond nid oedd o fewn amserlen y strategaeth hon ac nid oedd penderfyniad wedi’i wneud ar hyn eto; bod angen cynllunio'r ardal a'r gofynion ar y gwasanaeth llyfrgell drwy’r strategaeth hon;

.2 bod y strategaeth yn cyfeirio at adnoddau gwybodaeth gan gynnwys cyfryngau digidol a phrint; rhagwelwyd y byddai angen adolygu casgliadau print yn ystod y strategaeth a'u rheoli'n rhan o broses barhaus i reoli'r ardal; byddai'r rhain yn parhau i gael eu cynnal ar y cyd â cholegau ac ysgolion;

.3 bod gweledigaeth i adolygu deunyddiau oedd â gwerth ymchwil ar draws y DU a chydweithio i bennu ble roedd y rhain yn cael eu storio’n barhaol; byddai hyn yn caniatáu Memorandwm Cyd-ddealltwriaeth gydag unrhyw sefydliadau partner a chytundeb ar fecanweithiau i wneud yn siŵr bod modd eu rhannu; nid oedd disgwyl i staff neu fyfyrwyr orfod teithio i gael mynediad at y deunyddiau hyn; roedd gwaith yn mynd rhagddo ar hyn a bydd yr ysgolion yn cael rhagor o wybodaeth ar ôl ei ddatblygu.

Penderfynwyd

1049.2  cymeradwyo Strategaeth Newydd Llyfrgelloedd ac Archifau 2023 – 2027.

1050  Unrhyw Fater Arall

Nodwyd nad oedd unrhyw faterion eraill.

1051 Eitemau a gafwyd er gwybodaeth

Derbyniwyd y papurau canlynol er gwybodaeth:

• 22/856 Cofnodion y Pwyllgor Safonau ac Ansawdd Academaidd (ASQC) – 3 Gorffennaf 2023
• 23/233 Cofnodion y Pwyllgor Safonau ac Ansawdd Academaidd (ASQC) – 16 Hydref 2023
• 23/234 Cofnodion y Pwyllgor Addysg a Phrofiad Myfyrwyr (ESEC) – 3 Hydref 2023
• 23/242 Cytundeb Perthynas ag Undeb y Myfyrwyr a Siarter y Myfyrwyr
• 23/206 Datganiad Blynyddol ar Onestrwydd Ymchwil
• 23/235C Adroddiad Blynyddol gan y Pwyllgor Dyrchafiadau Academaidd
• 23/236C Monitro Cynllun Ffioedd a Mynediad (FAP) 22-23
• 23/237 Adroddiad Blynyddol Grantiau a Chontractau Ymchwil
• 23/238 Aelodaeth gweithwyr ar Is-bwyllgorau’r Brifysgol 2023-24 (penodiadau a wneir gan y Senedd)