Côd Ymddygiad ar gyfer Aelodau'r Cyngor
- Diweddarwyd ddiwethaf:
- Lawrlwytho'r ddogfen hon (PDF, 69.2 KB)
Côd Ymddygiad ar gyfer Aelodau'r Cyngor
1. A chithau’n un o aelodau’r Cyngor, ni ddylech ddwyn anfri ar y Brifysgol na'r Cyngor. Disgwylir i chi ymddwyn mewn ffordd sy'n gyson â Saith Egwyddor Bywyd Cyhoeddus y Pwyllgor Safonau mewn Bywyd Cyhoeddus bob amser. Y saith egwyddor yw:
Anhunanoldeb | Dylai popeth a wnewch fod er budd y bobl yn unig. Ni ddylech wneud rhywbeth sy’n golygu y byddwch chi, eich teulu neu eich ffrindiau’n elwa’n ariannol neu’n faterol. |
Uniondeb | Ni ddylech fod dan rwymedigaeth ariannol neu rwymedigaethau eraill i unigolion a allai geisio dylanwadu arnoch wrth i chi gyflawni eich dyletswyddau swyddogol. |
Gwrthrychedd | Dylech ymddwyn yn ddiduedd, yn deg ac ar sail teilyngdod, yn enwedig wrth roi contractau. |
Atebolrwydd | Rydych yn atebol i'r cyhoedd am eich penderfyniadau a'r hyn rydych yn ei wneud, a rhaid i chi gynnig eich hun i ba bynnag archwiliad sy’n briodol i'ch dyletswyddau. |
Agwedd agored | Dylech fod mor agored â phosibl am yr holl benderfyniadau a chamau gweithredu y gallwch eu cymryd. Dylech roi rhesymau dros eich penderfyniadau a chyfyngu ar wybodaeth pan fydd yn glir bod angen gwneud hynny er budd ehangach y cyhoedd. |
Gonestrwydd | Mae dyletswydd arnoch i ddatgan unrhyw fuddiannau preifat sy’n ymwneud â’ch dyletswyddau cyhoeddus a chymryd camau priodol i ddatrys unrhyw wrthdaro sy’n codi mewn ffordd sy’n diogelu buddiannau’r cyhoedd. |
Arweinyddiaeth | Dylech hyrwyddo, cefnogi a dangos safonau ymddygiad uchel a bod yn barod i herio ymddygiad gwael. |
2. A chithau’n ymddiriedolwr, rydych yn gyfrifol am gyflawni amcanion elusennol y Brifysgol. Rhaid i’ch penderfyniadau fod er budd buddiolwyr yr elusen. Mae gan yr elusen ystod eang ac amrywiol o fuddiolwyr. Maent yn cynnwys myfyrwyr yn benodol a phobl yn gyffredinol. Ar adegau, bydd blaenoriaethau carfanau gwahanol o fuddiolwyr yn gwrthdaro. A chithau’n ymddiriedolwr, bydd gofyn i chi wneud penderfyniadau i sicrhau bod adnoddau’n cael eu dyrannu’n briodol rhwng gweithgareddau, gan gynnwys sicrhau bod cronfeydd ariannol wrth gefn yn cael eu cynnal at ddibenion cynnal y sefydliad.
3. Rhaid i unrhyw beth a wna aelodau'r Cyngor fod o fewn y pwerau a roddwyd iddynt gan y Siarter a Statudau. Os byddwch chi neu unrhyw aelod arall yn mynd y tu hwnt i bwerau o'r fath, gallech fod yn bersonol atebol am ganlyniadau camau esgeulus neu ddiawdurdod a gymerwyd yn enw'r Brifysgol. Dylech hefyd sicrhau eich bod yn ymwybodol o Reoliadau Ariannol y Brifysgol ac yn eu parchu.
4. Mae gennych swydd gyfrifol sy’n cynnwys dyletswydd i barchu cyfrinachedd y Brifysgol a’i phartïon cysylltiedig.
5. Dylech fod yn ymwybodol o’r canlynol sy’n berthnasol i aelodau’r Cyngor:
5.1. mae gan bob aelod yr un statws a’i fod yr un mor gyfrifol ac atebol â’r aelodau eraill ym musnes y Cyngor;
5.2. nid yw unrhyw rai o aelodau'r Cyngor yn ddirprwy i unrhyw gorff, adran, person neu fudd;
5.3. wrth sicrhau bod y Brifysgol yn cydymffurfio ag unrhyw ofynion statudol neu weinyddol ar gyfer defnyddio arian cyhoeddus, mae cyfrifoldebau aelodau unigol y Cyngor yn cynnwys:
- sicrhau bod safonau llywodraethu corfforaethol uchel yn cael eu cyrraedd bob amser;
- pennu cyfeiriad strategol cyffredinol y Brifysgol o fewn y fframwaith polisïau ac adnoddau y cytunwyd arno gyda Chyngor Cyllido Addysg Uwch Cymru;
- goruchwylio'r gwaith o sicrhau canlyniadau arfaethedig drwy fonitro perfformiad yn erbyn amcanion a thargedau strategol y cytunwyd arnynt;
- sicrhau bod yr hyn a wna’r Cyngor o fewn terfynau ei awdurdod ac yn unol ag unrhyw amodau eraill sy’n ymwneud â defnyddio arian cyhoeddus;
- sicrhau, wrth wneud penderfyniadau, bod y Cyngor wedi ystyried unrhyw ganllawiau a gyhoeddwyd gan Gyngor Cyllido Addysg Uwch Cymru.
6. Dylech bwyso a mesur pob mater mewn ffordd adeiladol yn hytrach na bod yn gorff sy'n cymeradwyo camau gweithredu a pholisïau Bwrdd y Brifysgol yn ddi-gwestiwn.
7. Mae’r Brifysgol wedi ymrwymo i gefnogi, datblygu a hyrwyddo cydraddoldeb, amrywiaeth a chynhwysiant ym mhopeth a wna, a’i nod yw sicrhau diwylliant cynhwysol sy’n rhydd o wahaniaethu ac sy’n seiliedig ar werthoedd urddas, cwrteisi a pharch. Disgwylir i chi rannu a chefnogi'r ymrwymiad hwn.