Sut i gymryd rhan ym Masnach Deg
6 cham bach y gallwch chi eu cymryd sy'n cael effaith fawr
Rydym yn falch o fod yn brifysgol Masnach Deg, yn cynnig cynnyrch sydd wedi'i ardystio gan Fasnach Deg bob dydd, o'n te i'n coffi.
Gallwch chithau hefyd chwarae eich rhan mewn nifer o ffyrdd - dyma sut y gallwch chi helpu i wneud gwahaniaeth:
1. Dewis cynhyrchion Masnach Deg
Un o'r ffyrdd hawsaf o gefnogi Masnach Deg yw dewis nwyddau Masnach Deg pryd bynnag y gallwch. Boed hynny pan ydych chi’n prynu eich coffi boreol, byrbryd, neu ddanteithion melys, chwiliwch am label Masnach Deg yn ein bwytai a’n caffis ar y campws.
2. Rhannu’r neges
Rhannwch yr hyn rydych chi'n ei wybod am Fasnach Deg â'ch ffrindiau, cyd-ddisgyblion a chymdeithasau. Tynnwch sylw at yr effaith gadarnhaol y mae Masnach Deg yn ei chael ar gynhyrchwyr mewn gwledydd sy'n datblygu, o wella amodau gwaith i arferion cynaliadwy. Gall eich llais chi ysbrydoli eraill i ddewis Masnach Deg hefyd!
3. Mynd i ddigwyddiadau Masnach Deg
Cymerwch gamau ymarferol drwy fynd i ddigwyddiadau fel Clwb Swper Masnach Deg yng Nghaffi Green Shoots a'n marchnadoedd cynaliadwyedd. Mae'r digwyddiadau hyn yn ffordd wych o ddysgu rhagor amdano ac maen nhw hefyd yn rhoi’r cyfle i chi ymgysylltu â'r gymuned, cwrdd â phobl sydd â'r un ffordd o feddwl, a chefnogi'r achos yn uniongyrchol.
4. Rhannu eich adborth
Mae eich adborth yn amhrisiadwy wrth i ni lunio ein hymrwymiad i Fasnach Deg. Rhannwch eich syniadau a'ch awgrymiadau ynghylch cynhyrchion a mentrau Masnach Deg ar y campws. P’un ai drwy argymell cynnyrch newydd neu gynnig syniadau i hyrwyddo Masnach Deg ymhellach, mae eich mewnbwn yn ein helpu i wella ac ehangu ein harferion Masnach Deg.
5. Ymuno â’r sgwrs ynghylch Masnach Deg
Mae Masnach Deg yn fwy na mudiad yn unig - mae'n gymuned. Cysylltwch â mentrau Masnach Deg y Brifysgol ar y cyfryngau cymdeithasol, ewch i gyfarfodydd cynaliadwyedd yn ystod y tymor, a chymerwch ran mewn trafodaethau ynghylch Masnach Deg. Mae'n ffordd wych o feithrin cysylltiad ag eraill sy'n awyddus i wneud gwahaniaeth.
6. Rhagor o wybodaeth
Mae'r brifysgol yn cynnig ystod o adnoddau addysgol i'ch helpu i ddeall egwyddorion Masnach Deg yn well a'u heffaith ar fasnach fyd-eang. Defnyddiwch y rhain i ddyfnhau eich dealltwriaeth a hyrwyddo arferion moesegol a chynaliadwy.
Mae gennych chi rôl bwysig i’w chwarae, felly beth am fynd ati heddiw? Ewch i unrhyw gaffi neu fwyty CUFoods, bachwch eich hoff ddiod Masnach Deg, a chymerwch eich cam cyntaf tuag at gefnogi dyfodol tecach a mwy cynaliadwy.
