Cyrsiau athrawon

Oes gennych chi ddiddordeb mewn dod ag iaith a diwylliant Tsieina i'ch dosbarthiadau, cefnogi eich disgyblion gyda'u dysgu, neu ddysgu am yr iaith drosoch chi'ch hun?

Cwrs iaith a diwylliant Tsieina i athrawon

Mae ein cwrs Iaith a Diwylliant Tsieina i Athrawon wedi'i gynllunio gyda gweithwyr addysgu proffesiynol prysur mewn golwg. Erbyn diwedd y rhaglen, bydd gan y rhai sy’n cymryd rhan nid yn unig wybodaeth sylfaenol gadarn o Tsieinëeg Mandarin, ond hefyd bortffolio o adnoddau a gwersi i'w haddysgu eu hunain.

Y cwrs

Bydd y cwrs am ddim ar-lein 28 wythnos hwn yn cael ei gynnal am awr yr wythnos gan diwtor o Sefydliad Confucius Caerdydd. Bydd 22 o'r wythnosau hynny yn canolbwyntio ar ddysgu Mandarin sylfaenol, gyda'r bwriad o gefnogi eich disgyblion gyda’u dysgu nawr neu yn y dyfodol neu ddysgu am yr iaith ar gyfer eich datblygiad eich hun.

Bydd y dosbarthiadau iaith yn cael eu britho â chwe gwers sy'n canolbwyntio ar y diwylliant, lle byddwch chi’n dysgu am elfen benodol o Tsieina megis iechyd a lles, bwyd a gwyliau allweddol. Ar ôl pob un o'r sesiynau hyn, cewch fynediad i gyflwyniadau PowerPoint ac adnoddau/gweithgareddau sydd wedi cael eu paratoi gan ein tiwtoriaid, y gallwch chi eu defnyddio fel sesiynau annibynnol gyda'ch dosbarthiadau.

Sut mae’n gweithio

Mae’r cwrs wedi’i rannu’n dri cham, gan ganiatáu i athrawon ymuno ar lefel sy’n addas iddyn nhw.

Symud ymlaen

Ar ôl i chi gwblhau'r cwrs, cewch gyfle i symud ymlaen i gwrs DYSGU Tsieinëeg i Ddechreuwyr II Prifysgol Caerdydd ym mis Medi 2025. Byddai hyn yn cael ei ariannu'n llawn gan Sefydliad Confucius Caerdydd, ac yn caniatáu ichi weithio tuag at fodiwl lefel 3 neu 4 deg credyd mewn Tsieinëeg Mandarin.

Cofrestru

Os ydych chi'n athro ysgol gynradd neu uwchradd yng Nghymru sydd â diddordeb mewn cofrestru ar gyfer y cwrs hwn, llenwch y ffurflen hon.