Arwyddion rhybuddio i weithwyr addysg proffesiynol

Mae angen i ymarferwyr addysg fod yn effro i arwyddion rhybuddio camfanteisio troseddol ar blant.

Mae’n bosibl y bydd ymarferwyr addysg yn sylwi bod disgyblion a arferai fod yn sylwgar yn ymddieithrio oddi wrth addysg. Ond i’r gwrthwyneb, gall disgyblion a fu gynt yn aflonyddgar ddod yn sylwgar gan fod camfanteiswyr yn dechrau hyfforddi disgyblion i aros yn yr ysgol ac osgoi sylw gan athrawon.

Mae arwyddion rhybuddio ar gyfer ymarferwyr addysg yn cynnwys:

• patrwm o gofrestriadau tymor byr dro ar ôl tro mewn ysgolion, gallai hyn fod am dymor neu am gyfnod hwy.
• anafiadau anesboniadwy a symptomau annelwig
• hunan-niweidio neu arwyddion o drawma arall.

Gall pobl ifanc fod yn

• amwys am eu bywydau
• amharod i rannu unrhyw wybodaeth bersonol.

Efallai y byddan nhw’n amharod i ddatgelu'r hyn sy'n digwydd oherwydd ofn am yr hyn a fydd yn digwydd iddynt eu hunain neu i'w teuluoedd.

Efallai y bydd addysgwyr yn sylwi eu bod yn ailadrodd straeon tebyg i eraill, neu'n defnyddio termau nad ydyn nhw’n eu deall, oherwydd efallai eu bod wedi cael eu hyfforddi o ran yr hyn i'w ddweud gan y sawl sy’n camfanteisio arnyn nhw.

Dylai ymarferwyr addysg chwilio am newidiadau mewn ymddygiad, ymddangosiad neu eiddo newydd heb ei esbonio:

...newidiadau mewn presenoldeb, ymddangosiad corfforol, felly os ydyn nhw wedi blino ac yn edrych fel eu bod nhw wedi bod yn effro drwy’r nos, yn gwisgo pâr o Nikes gwerth £400, llawer o gadwyni a watshis, symiau uchel o arian na fyddech chi’n eu disgwyl i rywun ar y gofrestr bwyd ysgol am ddim, wedi meddwi... ac yn mynd i drwbl gyda’r awdurdodau yn aml.