Gwasanaeth Coffa Prifysgol Caerdydd

Mae'r digwyddiad hwn wedi dod i ben

Bydd Diwrnod y Cadoediad yn cael ei nodi ddydd Llun, 11 Tachwedd 2024 eleni. Dyma wahodd y staff, y myfyrwyr a’r cyhoedd i ddod i Wasanaeth Coffa’r Brifysgol a chymryd rhan mewn dwy funud o ddistawrwydd. Gofynnir i’r rhai sy’n dymuno bod yn bresennol gwrdd yn Oriel John Viriamu Jones (VJ) yn y Prif Adeilad am 10.50am er mwyn i’r digwyddiad allu dechrau’n brydlon. Mae croeso i bawb. Cofrestrwch i ddod, gan fod nifer y lleoedd yn brin.

Bydd y Gwasanaeth yn cael ei arwain gan y Llywydd a'r Is-Ganghellor, yr Athro Wendy Larner, y Caplan Cydlynu, y Barchedig Delyth Liddell, a Chaplaniaeth Aml-ffydd y Brifysgol.

Nodwch na fydd modd cael mynediad i Oriel VJ o fynedfa’r Prif Adeilad ar Rodfa’r Bedol rhwng 10.30am a 12.00pm, a dim ond y rhai sy’n mynd i’r Gwasanaeth Coffa a fydd yn cael mynediad o faes parcio Plas y Parc yn ystod y cyfnod hwn. Bydd gofyn i aelodau o’r staff a myfyrwyr ddangos eu cardiau adnabod. Ni fydd modd cael mynediad i’r oriel ar y llawr cyntaf o Oriel VJ yn ystod y Gwasanaeth, a bydd mynediad i’r Llyfrgell Gwyddoniaeth wedi’i gyfyngu.

Bydd mynediad i’r Prif Adeilad drwy fynedfeydd yr Ysgol Cemeg ac Ysgol Gwyddorau’r Ddaear a’r Amgylchedd yn cael ei ganiatáu drwy ddangos cerdyn adnabod staff/myfyriwr yn ystod y cyfnod hwn.

Peidiwch â dod â bagiau mawr i mewn i Oriel VJ. Os oes gennych fag sy’n llai o faint, un o’r amodau mynediad yw eich bod yn caniatáu i'ch bag gael ei archwilio at ddibenion diogelwch.

Gofynnir yn garedig i’r staff a’r myfyrwyr sy’n defnyddio’r Prif Adeilad rhwng 10.50am a 11.20am ar 11 Tachwedd gadw’r sŵn mor isel â phosibl.