Ffurflenni perchnogaeth amgen a Chydraddoldeb, Amrywiaeth a Chynhwysiant: profiadau gweithwyr treftadaeth Ddu, Asiaidd a lleiafrifoedd ethnig mewn cwmnïau sy’n eiddo i’r gweithwyr
Mae perchnogaeth gweithwyr o gwmnïau yn ddatblygiad cyffrous ar gyfer busnes moesegol, wrth i berchnogaeth gweithwyr ledaenu’n gyflym ar draws y DU.
Mae llenyddiaeth ymarferwyr yn honni bod y newid i berchnogaeth gweithwyr yn arwain at well llais a chyfranogiad gweithwyr, amodau cyflogaeth gwell, a phrofiad mwy cadarnhaol o waith yn gyffredinol. Ond mae ymchwil hefyd yn awgrymu nad yw pob gweithiwr yn elwa yn yr un modd nac i'r un graddau o'r newid hwn mewn perchnogaeth. Nod y prosiect hwn yw archwilio profiad gwaith gweithwyr treftadaeth lleiafrifoedd ethnig o fewn cwmnïau perchnogaeth gweithwyr.
Mae hwn yn gyfle i ymchwilwyr doethurol gymryd rhan mewn maes newydd hynod ddiddorol sydd â goblygiadau i waith gweddus, cydraddoldeb a’r gymuned. Gyda diddordeb mewn perchnogaeth gweithwyr yn arbennig o gryf, yn San Steffan a’r llywodraethau datganoledig, disgwylir y bydd canfyddiadau’r prosiect yn cael eu cyflwyno i sefydliadau sydd â diddordeb mewn ffurfiau perchnogaeth amgen, megis Cymdeithas Perchnogaeth y Gweithwyr, Cwmpas, Banc Datblygu Cymru, ac ymarferwyr yn y sector preifat. Bydd hyn yn sicrhau y bydd y myfyriwr mewn sefyllfa dda i ddatblygu rhwydweithiau personol, ymgolli yn yr amgylchedd perchnogaeth gweithwyr, a nodi cyfleoedd interniaeth.
Crynodeb
Mae perchnogaeth gweithwyr yn tyfu’n gyflym yn y DU yn dilyn Deddf Cyllid 2014, sy’n rhoi cymhellion i gwmnïau lle mae o leiaf 50% o gyfranddaliadau’n cael eu dal ar y cyd mewn ymddiriedolaeth ar gyfer pob cyflogai.
Mae hyrwyddwyr perchnogaeth gweithwyr yn honni bod y newid perchnogaeth, ynghyd â fforymau ar gyfer llais a chyfranogiad gweithwyr, yn arwain at amodau cyflogaeth gwell a phrofiad o waith. Fodd bynnag, mae ymchwil yn awgrymu nad yw pob gweithiwr yn elwa yn yr un modd nac i'r un graddau o'r newid hwn. Yn gyntaf, mae tystiolaeth i awgrymu nad yw hierarchaethau a strwythurau pŵer presennol yn cael eu herio gan y trawsnewid. Yn ail, lle nad yw strwythurau o'r fath yn cael eu herio, mae’r potensial yn parhau ar gyfer gwahaniaethu yn erbyn cyflogeion y gwyddys eu bod yn wynebu gwahaniaethu mewn cyd-destunau gweithle eraill. Ychydig iawn o ymchwil sydd, fodd bynnag, sy'n archwilio'n benodol i brofiadau cyflogeion o gyflogaeth o fewn sefydliadau perchnogaeth gweithwyr.
Nodau a chwestiynau ymchwil
Bydd y prosiect hwn yn ymchwilio i brofiad gwaith gweithwyr treftadaeth lleiafrifoedd ethnig, i ofyn: a yw perchnogaeth gweithwyr yn lleihau anghydraddoldeb a gwahaniaethu (hiliol) y gallai gweithwyr o dreftadaeth leiafrifol eu hwynebu ac os felly, beth yw nodweddion cwmnïau perchnogaeth gweithwyr sy’n esbonio'r gostyngiad hwn?
Bydd canfyddiadau'r prosiect hwn yn gwella ein dealltwriaeth o gydraddoldeb, amrywiaeth a chynhwysiant mewn theori ac yn ymarferol, ac yn benodol sut mae hyn yn effeithio ar weithwyr treftadaeth lleiafrifoedd ethnig ar lefel unigol. Yn fwy cyffredinol, bydd canfyddiadau yn cynyddu dealltwriaeth o sut mae arferion o fewn cwmnïau perchnogaeth gweithwyr yn gwella cydraddoldeb a chynhwysiant, ac i ba raddau y mae hyn yn cael effaith wahaniaethol ar grwpiau amrywiol o weithwyr.
Dull
Yn gyntaf, bydd arferion a gweithdrefnau yn y gweithle sy'n arwain yn aml at wahaniaethu yn cael eu nodi o waith ymchwil presennol. Yn ail, bydd bodolaeth arferion a gweithdrefnau o'r fath mewn sefydliadau perchnogaeth gweithwyr yn cael eu harchwilio, ynghyd ag archwilio graddau’r ymwybyddiaeth o gydraddoldeb, amrywiaeth a chynhwysiant a lefel y blaenoriaethu a roddir i wahaniaethu yn y gweithleoedd hyn, a'r arferion sy'n ceisio ei atal. Yn drydydd, bydd yr ymchwil yn gwerthuso profiad gweithwyr o dreftadaeth leiafrifol mewn perthynas â'r arferion, y gweithdrefnau a'r bwriadau a nodwyd.
Wrth gymharu achosion, dewisir 6 sefydliad mewn sectorau amrywiol, sydd wedi trosglwyddo i berchnogaeth gweithwyr ddim llai na phum mlynedd yn ôl. Cynhelir cyfweliadau gyda rheolwyr, staff AD, gweithwyr sy'n ymwneud â strwythurau perchnogaeth gweithwyr megis cynghorau gweithwyr, a gweithwyr o dras lleiafrifoedd ethnig.
Yn seiliedig ar wybodaeth gan y sefydliadau hyn, byddwch yn datblygu cynigion ar gyfer arferion da sy'n berthnasol i gysylltiadau cyflogaeth a llywodraethu sefydliadol, gan gynnwys o bosibl argymhellion polisi ac offer hyfforddi. Felly, trwy ddeall y ffactorau sy'n gwella neu'n tanseilio cydraddoldeb, amrywiaeth a chynhwysiant, bydd yr ymchwil yn cynnig dulliau mwy effeithiol i gwmnïau perchnogaeth gweithwyr gyflawni'r potensial sy'n gynhenid yn y strwythur perchenogaeth hwn, tra'n gosod cydraddoldeb, amrywiaeth a chynhwysiant fel elfen allweddol o 'swyddi da'.
Manteision
Bydd yr ymgeisydd llwyddiannus yn cael ei oruchwylio gan ymchwilwyr yn Ysgol Busnes Caerdydd ac Ysgol y Gwyddorau Cymdeithasol – y ddau yn cynnig amgylchedd ymchwil cyfoethog gan gynnwys yr Uned Ymchwil Cyflogaeth a Grŵp Ymchwil Sefydliadol Caerdydd, Marchnadoedd Gwaith, Cyflogaeth a Llafur, ac Ymfudo, Ethnigrwydd, Hil ac Amrywiaeth. Mae gan yr ysgol fusnes hefyd Grŵp Cydraddoldeb Hiliol sydd â chysylltiadau agos â Llywodraeth Cymru, gan alluogi cydweithio â rhanddeiliaid allanol tra bod Ysgol y Gwyddorau Cymdeithasol yn cydweithio â grwpiau cysylltiadau hiliol lleol.
