Canolfan Bywyd y Myfyrwyr

Mae Canolfan newydd Bywyd y Myfyrwyr bellach ar agor, ddydd Llun i ddydd Gwener, 08:00 - 20.00.

Mae Canolfan Bywyd y Myfyrwyr yn adeilad eiconig i fyfyrwyr yng nghanol y Brifysgol.

Prosiect dan arweiniad gwasanaeth yw Canolfan Bywyd y Myfyrwyr, sy’n cael ei gyflwyno mewn partneriaeth ag Undeb y Myfyrwyr, ac mae’n rhan o’r gwaith uwchraddio mwyaf ar y campws ers cenhedlaeth. Mae'n ffrwyth partneriaeth lwyddiannus a deinamig y mae’r Brifysgol yn falch o’i mwynhau gyda’i charfan o fyfyrwyr.

Mae’r adeilad newydd yn gartref i wasanaethau Bywyd Myfyrwyr y Brifysgol, gan gynnwys cymorth i astudio, iechyd a lles, paratoi ar gyfer y dyfodol, rheoli arian a byw yng Nghaerdydd. Bydd hefyd yn cynyddu'r cysylltiadau ag Undeb y Myfyrwyr ac yn gwella'r gwasanaethau a ddarperir yno eisoes.

Yn gryno

Gwaith galluogi’n dechrau: Yn gynnar yn 2018
Cwblhau’r gwaith: Hydref 2021
Mae disgwyl i’r gwaith amgylchfyd cyhoeddus gael ei gwblhau: Mawrth 2022
Pensaer: Feilden Clegg Bradley Studios
Contractwr Adeiladu: BAM Construction
Rheolwr Prosiect: AECOM
Rheolwr Costau: Currie & Brown

Mae Canolfan Bywyd y Myfyrwyr yn rhan o’n hymrwymiad i gynnig profiad rhagorol i fyfyrwyr, a bydd yn trawsnewid sut rydym yn darparu gwasanaethau cefnogi i myfyrwyr. Bydd ein gwasanaethau gwell yn sicrhau bod ein myfyrwyr yn teimlo eu bod yn cael eu cefnogi ar hyd eu taith, o ymgeiswyr yn ymddiddori mewn astudio yma i ymadael yn raddedigion balch.

Yn rhan o’r trawsffurfio, rydym ni’n datblygu gwasanaethau ar-lein 24 awr ac oriau agor estynedig i sicrhau mwy o hygyrchedd i’n myfyrwyr, gan gynnwys y rhai ym Mharc y Mynydd Bychan, y rhai sy’n dysgu o hirbell, a phawb sydd ar leoliad neu’n astudio dramor.

Y diweddaraf

Dyddiad	Gweithgaredd wedi’i Gynllunio
Hydref 2021	Bydd Canolfan Bywyd y Myfyrwyr yn agor ar gyfer addysgu ddydd Llun 4 Hydref 2021. Bydd gwasanaethau Bywyd y Myfyrwyr yn parhau i fod ar gael ar-lein tan ddydd Llun 11 Hydref 2021.
Medi 2021	Bydd gwaith celf tri myfyriwr israddedig yn cael eu troi’n osodiadau finyl ar raddfa fawr pan fydd Canolfan Bywyd y Myfyrwyr yn agor. Cyflwynodd y myfyrwyr eu dyluniadau fel rhan o gystadleuaeth a lansiwyd ym mis Mawrth 2021 i ddod o hyd i gelfwaith gwreiddiol i’w osod yn yr adeilad nodedig newydd ym Mhlas y Parc oedd i agor ar 4 Hydref 2021. Cynlluniodd yr enillwyr, y myfyrwyr blwyddyn olaf Shreshth Goel, Lizzie Eves ac Isaac Slater, eu ceisiadau ar gyfer mannau penodol yn yr adeilad. Rhagor o wybodaeth am y rhesymeg y tu ôl i'w gwaith celf a chyfle i gael cipolwg ar eu dyluniadau.
Ionawr 2021	O fis Ionawr ymlaen bydd nifer y lleoedd parcio ym maes parcio'r Prif Adeilad yn lleihau dros dro i wneud lle ar gyfer caban lles i’r staff adeiladu sy'n gweithio yng Nghanolfan Bywyd y Myfyrwyr. Bydd 24 lle (o gyfanswm o 120 o leoedd) yn cael eu neilltuo ar gyfer caban lles fydd yn caniatáu gweithwyr adeiladu ychwanegol ar safle Canolfan Bywyd y Myfyrwyr wrth lynu at ganllawiau coronafeirws y llywodraeth (COVID-19). Bydd hyn yn sicrhau bod y pandemig yn cael yr effaith leiaf bosibl ar ddyddiad cwblhau'r adeilad, sydd i fod yr haf hwn. Bydd Maes Parcio'r Prif Adeilad ar gau er mwyn i'r cabanau hyn gael eu symud yno yn ystod y cyfnod o ddydd Llun 4 Ionawr i ddydd Mercher 11 Ionawr. Ar hyn o bryd mae lle ym maes parcio Rhodfa Colum, sy'n daith gerdded fer rhwng pump a deg munud o'r Prif Adeilad. Mae meysydd parcio Parc Cathays ar gael dros dro i holl staff Parc Cathays sy'n gweithio ar y campws ar sail y cyntaf i'r felin heb unrhyw gost. Rhagor o wybodaeth am barcio ceir ym Mharc Cathays a gweld map o feysydd parcio'r Brifysgol
Hydref 2020	Mae fideo newydd sy’n nodi’n rhithwir gwblhau Canolfan Bywyd Myfyrwyr Prifysgol Caerdydd yn dangos pa mor bell mae’r gwaith adeiladu ar yr adeilad hwn, fydd yn trawsnewid canolfan ddinesig Caerdydd, wedi dod. Gwylio fideo newydd Canolfan Bywyd y Myfyrwyr
Hydref 2020	Bydd Plas y Parc yng Nghaerdydd ar gau i’r ddwy lôn o draffig rhwng 06:00 ddydd Sadwrn 17 Ebrill ac 20:00 ddydd Sul 18 Ebrill. Bydd y ffordd, sy’n mynd heibio Prif Adeilad Prifysgol Caerdydd yng nghanol y ddinas, ar gau er mwyn gallu symud craen tŵr o safle adeiladu Canolfan Bywyd y Myfyrwyr. Bydd Plas y Parc ar gau rhwng Costa Coffee, gyferbyn â’r Brif Adeilad, a Meithrinfa Prifysgol Caerdydd i’r de. Bydd Lôn Cathays, y ceir mynediad iddi ger Costa Coffee, ar gau hefyd yn ystod y dydd (o 07:00 tan 19:00 ddydd Sadwrn a dydd Sul) ond ar agor ar ôl 19:00 bob nos. Bydd y palmant ar ochr y Prif Adeilad/Brifysgol ger Plas y Parc yn parhau ar agor i gerddwyr drwy gydol y cyfnod.
Medi 2020	Mae Prifysgol Caerdydd wedi gosod lifft parhaol newydd ym mynedfa Plas y Parc i Undeb y Myfyrwyr. Rydym yn aros i'r lifft gael profion diogelwch llawn cyn y gellir ei ddefnyddio. Yn y cyfamser, dylai ymwelwyr sydd angen defnyddio'r lifft fynd i fynedfa Ffordd Senghennydd hyd nes y nodir fel arall. Os oes angen cymorth ar unrhyw fyfyriwr i fynd o Blas y Parc i Ffordd Senghennydd (ac fel arall) gallwch wneud cais am dacsi drwy gysylltu ag Undeb y Myfyrwyr (@cardiffstudents - Ffôn: 029 2078 1400). Gall unrhyw un sydd â phryderon ynghylch mynd i mewn i’r adeilad yn ystod y cyfnod hwn gysylltu â ni hefyd.
Mai 2020	Bydd Plas y Parc yng Nghaerdydd ar gau i’r ddwy lôn o draffig rhwng 06:00 ddydd Sadwrn 30 Mai a 18:00 ddydd Sul 31 Mai. Bydd y ffordd, sy’n mynd heibio Prif Adeilad Prifysgol Caerdydd yng nghanol y ddinas, ar gau er mwyn gallu symud craen tŵr o safle adeiladu Canolfan Bywyd y Myfyrwyr. Bydd Plas y Parc ar gau rhwng Costa Coffee, gyferbyn â’r Brif Adeilad, a Meithrinfa Prifysgol Caerdydd i’r de. Bydd Lôn Cathays, y ceir mynediad iddi ger Costa Coffee, ar gau hefyd yn ystod y dydd (o 07:00 tan 19:00 ddydd Sadwrn a dydd Sul) ond ar agor ar ôl 19:00 bob nos. Bydd y palmant ar ochr y Prif Adeilad/Brifysgol ger Plas y Parc yn parhau ar agor i gerddwyr drwy gydol y cyfnod. Mae BAM Construction yn parhau i weithio ar Ganolfan Bywyd y Myfyrwyr ar Plas y Parc, ond byddant yn diogelu eu gweithlu ar y safle drwy ddilyn canllawiau gweithredu newydd y Llywodraeth a'r diwydiant adeiladu.
Tachwedd 2019	Bydd y gwaith i gael gwared o risiau Undeb y Myfyrwyr yn cychwyn. Bydd yr adeilad yn parhau ar agor. Bydd yn dal i fod yn bosibl cael mynediad i Undeb y Myfyrwyr o Blas y Parc drwy fynediad dros dro newydd ar waelod y lôn sy'n rhedeg ochr yn ochr â gorsaf Cathays (ger Costa Coffee) a'r cledrau rheilffordd. O 18-30 Tachwedd, ni fydd mynediad lifft o Blas y Parc, ond bydd lifftiau ar ochr Ffordd Senghennydd o Undeb y Myfyrwyr yn gweithredu fel arfer. Cysylltwch ag Undeb y Myfyrwyr (@cardiffstudents - StudentsUnion@Cardiff.ac.uk - Ffôn +44 (0) 29 2078 1400) os bydd gennych chi bryderon am fynd i mewn i’r adeilad yn ystod y cyfnod hwn. Mae disgwyl i’r lifft newydd ar Blas y Parc fod yn weithredol o 30 Tachwedd, a bydd modd ei gyrraedd trwy’r fynedfa dros dro ar Blas y Parc. Bydd y trefniadau mynediad newydd i Undeb y Myfyrwyr yn eu lle tan fis Chwefror 2021.
O Ebrill 2019 ymlaen	Adeiladu ffrâm goncrit

Tarfu

Y niwsans mwyaf cyffredin a gynhyrchir gan y gwaith adeiladu yw llwch a sŵn. Ni ellir byth ei osgoi, ond gellir ei reoli drwy dampio i lawr, gan ddefnyddio byrddau a tharpolinau. Wrth i'r prosiect ddechrau datblygu, hoffem ddiolch i chi am fod yn amyneddgar.

Diogelwch yw'r flaenoriaeth. Mae’r cwmni adeiladu wedi cynllunio’r safle i fod yn addas ar gyfer yr ardal o'i gwmpas gan wneud yn siŵr bod y gwaith adeiladu ac amgylchedd y Brifysgol wedi'u gwahanu'n effeithiol. Mae aelod o dîm y safle yn gyfrifol am weithio'n agos gyda'r Brifysgol i sicrhau diogelwch staff, myfyrwyr ac ymwelwyr.

Hygyrchedd

Bydd y fynedfa i orsaf drenau Cathays yn parhau ar agor drwy gydol y cyfnod adeiladu.

Bydd mynediad i Undeb y Myfyrwyr o Blas y Parc yn parhau ar agor drwy gydol y rhaglen adeiladu. Bydd modd cael mynediad fel arfer o Ffordd Senghennydd.

Mae'r Ganolfan Bywyd y Myfyrwyr wedi'i chynllunio gyda chynaliadwyedd mewn golwg. Bydd yn canolbwyntio ar leihau'r defnydd o ynni, cyflenwi ynni yn effeithlon, a lle bo modd, defnyddio technoleg adnewyddadwy i gadw ôl troed carbon yr adeilad mor isel â phosibl. Mae rhai o’r nodweddion dylunio yn cynnwys celloedd ffotofoltäig, defnyddio system awyru naturiol, to gwyrdd a goleuadau ynni effeithlon.

Bydd yr adeilad yn cael ei asesu o dan Ddull Asesu Amgylcheddol y Sefydliad Ymchwil Adeiladu (BREEAM) ac mae ar y trywydd iawn i gyflawni sgôr Ardderchog BREEAM. Mae BREEAM yn mesur gwerth cynaliadwy mewn cyfres o gategorïau, yn amrywio o ynni i ecoleg.