Arloesedd cyfrifol

Rydym yn gweithredu mewn modd rhyngddisgyblaethol sy’n canolbwyntio ar y rhanddeiliad i nodi sbardunau, prosesau a chanlyniadau arloesedd, a gwerthuso goblygiadau cymdeithasol, ariannol ac ymddygiadol newid technolegol.

Mae ein pwyslais ar arloesedd cyfrifol wedi annog ymchwil helaeth ar gadwyni cyflenwi cynaliadwy, logisteg werdd a sicrhau buddion cymunedol drwy gaffael cyhoeddus a phreifat.

Rydym wedi defnyddio ein hystod eang o arbenigedd yn y maes hwn fel catalydd i hybu arloesedd cyfrifol ar draws Prifysgol Caerdydd a rhanbarth ehangach Caerdydd drwy:

ymgysylltu mewn cydweithrediadau mawr, fel ASTUTE lle rydym yn ffurfio partneriaethau â BBaChau
arwain datblygiad parc ymchwil gwyddorau cymdeithasol newydd Prifysgol Caerdydd - sbarc | SPARK
ffurfio partneriaethau ag arweinwyr y sector, megis DSV-Panalpina, i ddatblygu prosesau a systemau cynaliadwy ar draws y diwydiant
cydweithredu â’r Lab - Labordy Arloesedd Gwasanaethau Cyhoeddus Cymru
cydlynu digwyddiadau a mentrau’r Rhwydwaith Arloesedd Cyfrifol
sefydlu’r Ganolfan Ymchwil Polisi Arloesedd
a chydweithredu â’r Ysgolion Cyfrifiadureg, Mathemateg a Pheirianneg ar Blockchain a Deallusrwydd Artiffisial.

Rhwydwaith arloesedd cyfrifol

Sefydlwyd ein Rhwydwaith Arloesedd Cyfrifol (RIN) gan yr Athrawon Tim Edwards a Luigi De Luca, arbenigwyr yn y meysydd astudiaethau sefydliadol a marchnata, i annog perthnasau cydweithredol a ‘hyrwyddo dealltwriaeth, ymarfer a gwasgariad arloesedd cyfrifol.’

Mae’r Rhwydwaith yn gweithredu ar reng flaen ymchwil ryngddisgyblaethol sydd o bwys rhyngwladol, gan gefnogi entrepreneuriaid benywaidd ac entrepreneuriaid sy’n ffoaduriaid; sicrhau bod arloesiadau a lywir gan dechnoleg sydd wedi’u dylunio yn Affrica ac America Ladin yn cyd-fynd â dewisiadau cymunedau lleol a chynaliadwyedd; defnyddio cyllid i ymgysylltu â phlant ysgol Caerdydd yn y defnydd cyfrifol o gyfryngau cymdeithasol; a mynd i’r afael â thymereddau dan do uchel a chynhyrchu ffrydiau incwm cynaliadwy ar gyfer teuluoedd yn Nigeria.

Darogan er lles cymdeithasol

Mae Dr Bahman Rostami-Tabar yn cynnal Cymrodoriaeth Ymgysylltu Gwerth Cyhoeddus sy’n canolbwyntio ar weithgareddau ymchwil ac ymgysylltu ar ddarogan er lles cymdeithasol. Mae ysgolorion wedi defnyddio technegau darogan fel adnodd cynllunio sy’n helpu sefydliadau i bennu perfformiad ariannol y dyfodol.

Mae Dr Rostami-Tabar yn defnyddio technegau darogan i ragweld anghenion pobl a lleoedd yn y dyfodol. Mae hyn wedi arwain at gyd-gynhyrchu effaith ymchwil gyda’r Groes Goch Ryngwladol, Gwasanaeth Ambiwlans Cymru a’r GIG.

Gwneud gwahaniaeth drwy ein gwaith ymchwil

Mae ein gwaith ymchwil yn effeithio ar bobl a pholisi, gan wneud gwahaniaeth i’n heconomi a’n cymdeithas.

Arloesedd mewn gwasanaethau mabwysiadu

Mae Partneriaeth Trosglwyddo Gwybodaeth Dr Jayne Lynch gyda’r Ysgol Seicoleg a Chymdeithas Plant Dewi Sant, sydd wedi ennill gwobrau, wedi atgyfnerthu gwasanaethau mabwysiadu drwy ddod o hyd i gartrefi parhaol i’r plant sy’n aros hiraf am deulu, a chefnogi’r trefniadau hyn yn therapiwtig.

Trawsnewid caffael

Mae’r Athrawon Jonathan Gosling a Mohamed Naim wedi gweithio gyda phartneriaid ar draws y sectorau priffyrdd a gweithrediadau i wella gallu caffael mewn sefydliadau sy’n cynnal prosiectau seilwaith mawr.

Prosesau rhestr eiddo newydd

Gweithiodd yr Athro Aris Syntetos gyda chydweithwyr o Ysgol Busnes EM Lyon, Prifysgol Dechnegol Darmstadt a chymdeithas fasnach ym Mrwsel i ymchwilio i wallau mewn rhestrau eiddo i ddarganfod a all rhestrau eiddo manwl helpu i gynyddu gwerthiannau.