Ewch i’r prif gynnwys
Ysgol Busnes Caerdydd

Mae cynhyrchiant yn allweddol i wella llesiant cenedlaethau’r dyfodol yng Nghymru

A women on an ipad with icons showing a handshake, a puzzle, people, a cog and a heart

Nid ystadegyn economaidd digalon yn unig yw perfformiad cyson wael Cymru o ran cynhyrchiant – mae’n effeithio ar fywydau pawb.

Mae tueddiad i feddwl am gynhyrchiant fel mesur economaidd haniaethol heb fawr o berthnasedd i fywydau pob dydd pobl.

Ac eto, dylai cynhyrchiant, gan ei fod yn sbardun allweddol i safonau byw, fod o bwys i bawb yng Nghymru. Mae Fforwm Cynhyrchiant Cymru yn esbonio pam...

  • i weithwyr
    • mae twf cynhyrchiant yn golygu cyflog uwch a llai o angen am weithio oriau hwy.
  • i fusnesau
    • mae cynyddu cynhyrchiant yn fodd i wobrwyo gweithwyr presennol, gostwng pris nwyddau a gwasanaethau, buddsoddi yn y dyfodol a chreu swyddi newydd.
  • i wasanaethau cyhoeddus
    • mae cynyddu cynhyrchiant yn golygu gwell darpariaeth a llai o restrau aros a gorlenwi.
  • i lywodraethau
    • mae cynhyrchiant uwch yn darparu’r adnoddau ychwanegol i wella gwasanaethau cyhoeddus a chyflawni nodau cymdeithasol, fel diogelu’r amgylchedd a lleihau anghydraddoldeb.
  • i ardaloedd lleol
    • mae twf cynhyrchiant yn cynnig mecanwaith i fynd i’r afael ag anghydraddoldebau rhanbarthol.
  • i Gymru
    • mae enillion cynhyrchiant cenedlaethol yn golygu defnydd mwy effeithiol o adnoddau, mwy o ffyniant a gwell ansawdd bywyd.

“Rydyn ni’n gwybod bod materion fel cyflogau go iawn sy’n ddisymud, rhestrau aros yn y GIG a safonau byw is ar flaen meddyliau pobol Cymru. Yr hyn sy’n cael ei ddeall yn llai yw bod twf cynhyrchiant, drwy wneud defnydd mwy effeithiol o’n hadnoddau, yn ganolog i fynd i’r afael â’r heriau hyn.”
Yr Athro Melanie Jones Professor of Economics, Deputy Section Head - Research, Innovation and Engagement

Mae angen sylw brys a chyfunol felly i’r diffyg mawr a pharhaus ynghylch cynhyrchiant rhwng Cymru a gweddill y DU. Yn wir, mae twf cynhyrchiant yn allweddol i gyflawni nodau Deddf Llesiant Cenedlaethau’r Dyfodol yng Nghymru.

Mae llunwyr penderfyniadau yng Nghymru eisoes yn cael eu hannog i ystyried effaith hirdymor eu dewisiadau, ond mae angen i gynhyrchiant fod wrth wraidd hyn. Wrth godi cynhyrchiant, gallwn ni wella ansawdd swyddi a gwasanaethau cyhoeddus, a sicrhau bod adnoddau ar gael i gyflawni ein nodau cymdeithasol ac amgylcheddol.

“Mae angen i ni gefnogi ac annog busnesau bach a mawr i ddeall a mesur cynhyrchiant yn well yn eu sefydliad, fel ei bod yn dod yn bosibl olrhain a thargedu twf cynhyrchiant.”
Rhian Elston (Cyfarwyddwr Buddsoddi Cymru, Banc Datblygu Cymru), Aelod o Fforwm Cynhyrchiant Cymru

Sut gallwn ni gyflawni hyn?

Mae Fforwm Cynhyrchiant Cymru yn cyflwyno pum argymhelliad trosfwaol i wella twf cynhyrchiant yng Nghymru. Rydyn ni’n dadlau bod gwella cynhyrchiant yng Nghymru yn galw am y canlynol:

  • gwell dealltwriaeth o'r hyn y mae'n ei olygu i fod yn gynhyrchiol ar lefel unigol, sefydliadol a chenedlaethol.
  • ymrwymiad gan Lywodraeth Cymru a Llywodraeth y DU i strategaeth sefydlog a hirdymor i gefnogi twf cynhyrchiant cynaliadwy.
  • mwy o gydnabyddiaeth o bwysigrwydd twf cynhyrchiant o fewn y sector cyhoeddus.
  • rhannu cyfrifoldeb a chamau gweithredu cydgysylltiedig, gyda busnesau, darparwyr gwasanaethau cyhoeddus a llunwyr polisïau lleol a chenedlaethol yn mesur a thargedu cynhyrchiant.
  • craffu, cyngor a gwerthuso parhaus ac annibynnol ar gynnydd.

“Mae’r GIG yn wynebu her hirdymor wrth i’n poblogaeth heneiddio. Ni fydd ariannu’r galwadau cynyddol ar ein system yn ymarferol i’r trethdalwr; ac ni fydd y gweithlu sydd ei angen arnom ar gael. Bydd cyflawni gwelliannau cynhyrchiant yn hanfodol i fynd i’r afael yn rhannol â’r her hon.”
Huw Thomas (BIP Hywel Dda – Cyfarwyddwr Cyllid), Aelod o Fforwm Cynhyrchiant Cymru

Rhagor o wybodaeth am Her Cynhyrchiant Cymru.