Cydweithio’n ymarferol gyda diwydiant: Wales Perfumery a myfyrwyr MSc Ysgol Busnes Caerdydd

Safbwyntiau myfyrwyr: profiad dysgu ystyrlon

Pwysleisiodd Grace Dawson fanteision ymarferol y prosiect:

“Drwy weithio ar fusnes go iawn yn yr astudiaeth achos fe wellodd fy sgiliau meddwl strategol a gwneud penderfyniadau yn fawr. Roedd yn rhaid i ni sicrhau bod syniad yr ymgyrch yn cyd-fynd â hunaniaeth y brand gan gadw o fewn y gyllideb. Roedd hyn yn gwneud y profiad yn heriol ac yn werth chweil.

Hwn oedd un o’r profiadau mwyaf allweddol yn y cwrs meistr hyd yma a bydd yn fuddiol iawn i mi wrth greu a chyflawni ymgyrchoedd marchnata a brandio yn y dyfodol. Bydd hefyd yn bwnc gwych i’w drafod mewn cyfweliadau am swyddi yn y dyfodol!”

Kayleigh Enriquez
“Cefais i fy nenu at Wales Perfumery i ddechrau gan y stori y tu ôl i’r brand. Cefais fy nghymell i greu rhywbeth fyddai'n cyfoethogi eu cynnig. Roedden ni'n canolbwyntio ar ecwiti brand, lleoli, ac ymddygiad defnyddwyr ymhlith Gen Z.

Drwy weithio ar achos busnes go iawn fe wellodd fy nealltwriaeth o farchnata, gan amlygu realiti'r opsiynau cyllidebu amrywiol a dangos yr her wirioneddol ynghlwm â meithrin cynllun cymhleth a strategol ar gyfer y brand heb niweidio ei ecwiti a’i ddelwedd bresennol.”

Adleisiodd Joanne Shaddick yr un teimlad:
“Roedd cael sylfaenydd Wales Perfumery yn siarad am ei chwmni ac yn rhannu ei hangerdd yn ysbrydoliaeth. Roedd cael prosiect 'byw' i weithio arno'n golygu bod yn rhaid i ni sicrhau bod popeth roedden ni'n ei awgrymu yn ymarferol a bod modd ei weithredu'n realistig.

Roedd gwybod y gallai ein hargymhellion gael effaith wirioneddol yn ein hysgogi i sicrhau bod ein cyflwyniad yn raenus ac yn broffesiynol. Mae’r profiad wedi bod yn baratoad gwych ar gyfer gyrfa mewn marchnata yn y dyfodol.”

Safbwynt y cyflogwr: manteision ymgysylltu â myfyrwyr

Mae gan Louise, sylfaenydd Wales Perfumery, gysylltiad cryf ag Ysgol Busnes Caerdydd, ar ôl cwblhau rhaglen Help i Dyfu: Rheoli yr ysgol cyn hyn.

Wrth sôn am y ddarlith wadd a’r prosiect myfyrwyr, dywedodd:

“Rydw i wir yn mwynhau ymgysylltu â myfyrwyr mewn lleoliad academaidd. Yn fy mywyd gwaith blaenorol ym maes fferylliaeth, byddwn i’n rhoi cyflwyniadau i fyfyrwyr prifysgol a dyma oedd rhan fwyaf boddhaus fy swydd bob amser. Creodd y cwrs Help i Dyfu a gwblheais fis Rhagfyr diwethaf y teimlad hwnnw o bartneriaeth a chydweithio i gyflawni mwy.

Mae’r myfyrwyr wedi dangos gwir ddiddordeb; roeddwn i'n gobeithio y gallai rhannu fy nhaith fel entrepreneur annog unrhyw un i gredu ynddyn nhw eu hunain ac i feddwl y tu allan i’r bocs. Roedd yn wych cael rhannu gwybodaeth am y diwydiant Persawr Arbenigol a’r tueddiadau sydd ar gynnydd yn y DU ac yn fyd-eang.

Roedd nifer o bethau cofiadwy'n codi drwy weithio gyda'r myfyrwyr; maen nhw'n gweld pethau o safbwynt gwahanol, wrth gwrs. Maen nhw'n gwybod am y tueddiadau marchnata a'r datblygiadau brand diweddaraf, ac roedden ni wrth ein bodd gyda'u hadborth a'u dealltwriaeth. Rydyn ni’n gweithio i roi rhai o’r syniadau hyn ar waith ac yn gobeithio ffurfio partneriaeth gyda myfyriwr ar leoliad.”