Organau bach ar gyfer darganfod cyffuriau canser

Newid y ffordd yr ydym yn dod o hyd i driniaethau canser newydd trwy ddod â thechnegau organoid i raddfa datblygu cyffuriau.

Mae llawer o gyfyngiadau ar brofi triniaethau canser posibl newydd ar gelloedd a dyfir yn uniongyrchol ar ddysglau Petri. Mae celloedd sy'n gorwedd ar wyneb gwastad wedi'u cyfyngu o ran pa mor gywir y gallant adlewyrchu bioleg organ ddynol tri dimensiwn yn y corff. Roedd angen model gwell ar gyfer tiwmorau ar ymchwilwyr, yn ogystal â model y gellid ei gynhyrchu yn y symiau mawr sy’n angenrheidiol ar gyfer datblygu cyffuriau. Roedd gwyddonwyr ym Mhrifysgol Caerdydd yn gallu bodloni'r angen hwn a oedd heb ei ddiwallu.

Mae organoidau tiwmor yn offeryn darganfod cyn-glinigol pwerus ar gyfer triniaethau cyffuriau gwrth-ganser newydd. Ond er mwyn i organoidau gael eu defnyddio i ddatblygu cyffuriau, mae angen eu cynhyrchu mewn symiau mawr. Rhaid i'r rhain fod yn unffurf o ran maint ac adeiledd a rhaid bod modd atgynhyrchu'r sypiau.

Ar hyn o bryd mae Cellesce Ltd yn werth £15 miliwn ac mae wedi sicrhau contractau allweddol gyda chwmnïau fferyllol a datblygu ymchwil rhyngwladol.

Mae'r broses unigryw a ddatblygwyd gan Cellesce Ltd yn galluogi cynyddu cynhyrchiant organoidau o ran nifer ac unffurfiaeth, o gymharu â dulliau eraill. Mae hyn yn galluogi mwy o gywirdeb ac ailadroddadwyedd wrth brofi cyffuriau canser newydd. Mae pob swp yn cynnwys hyd at 5 miliwn o organoidau, sy'n ddigonol ar gyfer tua 30,000 o brofion cyffuriau fesul swp. Mae dulliau eraill o ffurfio organoidau’n cefnogi tua 1,000 o brofion cyffuriau fesul swp.

Trwy ddefnyddio eu harbenigedd ymchwil mewn modelau organoid canser i ddatblygu proses â phatent, roedd yr ymchwilwyr ym Mhrifysgol Caerdydd a Cellesce Ltd yn gallu meithrin organoidau o ansawdd uchel i gwmnïau fferyllol ar draws y byd, i'w defnyddio i ddarganfod cyffuriau.