Cyfres Papurau Gwaith

Mae'r Gyfres Papurau Gwaith yn cyhoeddi ac yn hyrwyddo gwaith ein hymchwilwyr at ddibenion dosbarthu ac yn hyrwyddo datblygiad allbynnau ymchwil ar gyfer eu cyhoeddi ymhellach mewn cyfnodolion academaidd.

Nod y Gyfres Papurau Gwaith yw lledaenu canlyniadau ymchwil cychwynnol, adroddiadau technegol, a thrafodion/cyflwyniadau cynadleddau i alluogi ymchwilwyr i gyfleu canfyddiadau eu gwaith i gynulleidfa ehangach mewn modd amserol.

Manteision Cyfres Papurau Gwaith Ysgol Pensaernïaeth Cymru yw y bydd:

• yn lledaenu canlyniadau ymchwil yn gyflym
• yn cyfleu canlyniadau cychwynnol i gynulleidfaoedd academaidd ac anacademaidd allanol
• yn codi ymwybyddiaeth o ymchwil a wneir yn Ysgol Pensaernïaeth Cymru
• yn derbyn adborth mewnol ac allanol ar waith sydd ar y gweill
• yn ennyn diwylliant ymchwil yn Ysgol Pensaernïaeth Cymru
• yn cynnwys ymchwil yr Ysgol yn awtomatig ar gronfa ddata'r Llyfrgell Brydeinig.

Y drefn gymedroli a golygu

Mae angen cyflwyno papurau i'r tîm golygyddol: poortingaw@cardiff.ac.uk ac yna cânt eu hadolygu'n annibynnol gan gymheiriaid sy'n aelodau academaidd eraill o'r Ysgol (mewn rhai achosion efallai yr holir adolygwyr allanol). Os yw safon papur yn ddigon uchel caiff ei gynnwys yng Nghyfres Papurau Gwaith Ysgol Pensaernïaeth Cymru a'i gyhoeddi ar ei gwefan.

Noder na ellir ystyried papurau i'w cyhoeddi yn y Gyfres Papurau Gwaith os ydynt wedi'u cyhoeddi yn rhywle arall, wedi eu derbyn i'w cyhoeddi neu'n cael eu hadolygu. Fodd bynnag, yn dilyn hynny, gellir cyflwyno, cyhoeddi neu anfon papurau a gyflwynwyd i'w cyhoeddi mewn mannau priodol eraill fel cyfnodolion a adolygir gan gymheiriaid, llyfrau (penodau) neu drafodion cynadleddau.

Seilir y penderfyniad i gyhoeddi papur fel rhan o Gyfres Papurau Gwaith Ysgol Pensaernïaeth Cymru ar:

• ansawdd yr ysgrifennu a chyflwyniad y data a chanfyddiadau ymchwil
• cyfanrwydd y data yn nhermau cyflwyno amcanion, adolygiad llenyddiaeth, dulliau ymchwil, canfyddiadau a goblygiadau ar gyfer ymchwil academaidd, polisi a/neu ymarfer pellach.

Canllawiau cyflwyno

Gellir cyflwyno papurau i'r tîm golygyddol: poortingaw@caerdydd.ac.uk ac fe'u hadolygir ar sail dreigl wrth iddynt gael eu cyflwyno. Caiff y papurau gwaith a dderbynnir eu cyhoeddi ar wefan Ysgol Pensaernïaeth Cymru ac anfonir copi i'r Llyfrgell Brydeinig.

• Rhaid cyflwyno'r llawysgrif (tudalen deitl, crynodeb, prif destun, ffigurau, tablau, cyfeirnodau ac atodiadau) mewn un ddogfen ar fformat Word.
• Disgwylir y bydd testun y llawysgrif (ac eithrio crynodeb, ffigurau, tablau, cyfeirnodau ac atodiadau) rhwng 3,000 a 6,000 gair, er y caiff testunau hirach a byrrach eu hystyried hefyd yn achlysurol.
• Rhaid i bob cyflwyniad ddefnyddio templed Papur Gwaith Ysgol Pensaernïaeth Cymru.
• Dylai'r dudalen teitl gynnwys teitl (a lle bo'n briodol, isdeitl). Dylai'r dudalen teitl hefyd gynnwys enw(au) yr awdur(on).
• Ni ddylai'r crynodeb fod dros 200 o eiriau.
• Gellir defnyddio hyd at saith gair allweddol i ddisgrifio'r ymchwil.
• Gellir defnyddio unrhyw strwythur testun. Fodd bynnag, mae angen fformatio'r cynnwys yn ôl templed/canllawiau'r Papur Gwaith; gofynnir i chi beidio â defnyddio mwy na phedair lefel pennawd, ac mae angen cysylltu'r dudalen cynnwys yn awtomatig â'r testun.
• Dylid mewnosod yr holl ffigurau a thablau yn y testun yn y lleoliad y dylent ymddangos.
• Dylid cadw troednodiadau i isafswm. Os cânt eu defnyddio, dylid eu nodi yn y testun gyda ffigurau uwch-sgript a'u casglu ar ddiwedd y testun (cyn y cyfeirnodau). Dylai'r troednodiadau fod yn ddealladwy heb orfod darllen y testun.
• Rhaid defnyddio dull cyfeirnodi cromfachol drwyddi draw (e.e. Harvard). Rhaid i'r arddull cyfeirnodi fod yn gyson drwyddi draw. Dylai'r awdur(on) dalu sylw penodol i gywirdeb a chyflwyniad cywir y cyfeirnodau.
• Rhaid cydnabod pob ffynhonnell o gymorth yn y llawysgrif. Dylech gynnwys rhif y prosiect ar gyfer prosiectau ymchwil a gyllidir yn allanol.
• Rhaid i'r awdur(on) gyflawni'r holl anghenion fformatio a golygu.
• Yr awdur(on) sy'n cadw'r hawlfraint ac mae pob barn a fynegir yn y papur gwaith yn eiddo i'r awdur(on) yn unig ac ni ddylid ystyried mai dyma farn Ysgol Pensaernïaeth Cymru na Phrifysgol Caerdydd.

Seminarau

Bydd cyfres seminarau yn cyd-fynd â Chyfres Papurau Gwaith Ysgol Pensaernïaeth Cymru. Disgwylir y bydd yr awduron yn cyflwyno eu gwaith i'r Ysgol ac yn trafod materion a godir yn y papurau a gyhoeddir. Caiff dyddiadau a phynciau eu cyhoeddi a'u lledaenu pan gaiff papur ei dderbyn.

Papurau gwaith