![](https://cardiff.imgix.net/__data/assets/image/0009/2740059/jamilla_teaser.jpg?w=640&h=360&auto=format&fit=crop&q=60&fit=crop)
Hyrwyddo newid cadarnhaol i iechyd meddwl yn y gymuned Fwslimaidd
Jamilla Hekmoun (MA 2018) yw cadeirydd y Gynghrair Iechyd Meddwl Mwslimaidd (MMHA). Bu’n gweithio’n ddiflino yn ystod y pandemig yn darparu adnoddau a chefnogaeth i’r gymuned Fwslimaidd. Mae hi hefyd yn aelod o fwrdd Cyngor Mwslimaidd Cymru ac yn arwain ymgysylltu cymunedol ar gyfer SEF Cymru. Cawsom sgwrs gyda Jamilla am ei chyfnod ym Mhrifysgol Caerdydd a’r gwaith pwysig y mae’n ei wneud yn y gymuned.
Jamilla Hekmoun (MA 2018) yw cadeirydd y Gynghrair Iechyd Meddwl Mwslimaidd (MMHA). Bu’n gweithio’n ddiflino yn ystod y pandemig yn darparu adnoddau a chefnogaeth i’r gymuned Fwslimaidd. Mae hi hefyd yn aelod o fwrdd Cyngor Mwslimaidd Cymru ac yn arwain ymgysylltu cymunedol ar gyfer SEF Cymru. Cawsom sgwrs gyda Jamilla am ei chyfnod ym Mhrifysgol Caerdydd a’r gwaith pwysig y mae’n ei wneud yn y gymuned.
Roedd Jamilla eisiau dod i Gaerdydd ar ôl astudio modiwl o’r enw ‘Mwslimiaid ym Mhrydain’ yn ystod ei gradd israddedig. Esboniodd, “Fe wnes i ddod o hyd i gwrs MA yng Nghaerdydd o’r enw Islam ym Mhrydain Gyfoes, ac roedd yn swnio’n berffaith.” “Bûm yn ffodus iawn o gael ysgoloriaeth i’m galluogi i astudio’r cwrs.”
Mae’r penderfyniad i astudio’r MA yng Nghaerdydd wedi talu ar ei ganfed. “Roeddwn i’n hoff iawn o’r ddinas ac roedd pawb yn gyfeillgar ac yn barod i helpu. Roedd fy narlithwyr i gyd yn hyfryd!” dywedodd Jamilla wrthym.
Mae Jamilla yn hyrwyddo trafodaethau mwy cadarnhaol ar iechyd meddwl, ac roedd yn cydnabod nad yw hyn yn hawdd i bawb. “Rwy’n credu bod siarad am iechyd meddwl yn helpu pobl i deimlo’n fwy hyderus wrth geisio cefnogaeth. Ond ni ddylent deimlo pwysau i siarad am eu hiechyd meddwl gan ei fod yn bwnc personol.”
Er ei bod yn cydnabod yr angen am fwy o wasanaethau iechyd meddwl, nododd hefyd fod angen mwy o gefnogaeth mewn meysydd eraill a all effeithio ar iechyd meddwl. “Mae goblygiadau tlodi, hiliaeth, ac ati yn bethau na ellir eu datrys trwy therapi.” Mae hyn yn arbennig o gyffredin yng nghanol argyfwng costau byw yn y DU, sef rhywbeth mae Jamilla yn ymwybodol ohono. “I rywun sydd bellach yn gorfod dewis rhwng gwresogi a bwyta, ac yn cael problemau iechyd meddwl, dim ond rhan fach o’r broblem y bydd gwasanaethau fel therapi a chwnsela yn ei datrys. Mae angen ymyrraeth gref ar lefel y llywodraeth.”
Materion fel y rhain, ynghyd â’r pandemig, a arweiniodd Jamilla i ddod yn rhan o’r MMHA. Fe’i sefydlwyd ar ddechrau’r pandemig, ac esboniodd Jamilla pa wasanaethau y mae’r gynghrair yn eu cynnig a pham y daeth yn rhan ohono. “Mae’r MMHA yn rhwydwaith o sefydliadau Iechyd Meddwl Mwslimaidd, ac rydyn ni’n gweithio gyda’n gilydd i gynnig adnoddau wedi’u cydlynu, a chyfeirio at ein gilydd. Rydyn ni wedi trefnu gweminarau a chynnal cynhadledd, a’n nod yw ceisio helpu a chyrraedd cymaint o bobl â phosib.”
“Cefais y fraint o gymryd rhan ar y dechrau trwy fy ngwaith yn y Llinell Gymorth Ieuenctid Mwslimaidd, ac yn fuan wedyn dod yn gadeirydd y Gynghrair.” Aeth ymlaen, “Roeddwn i eisiau cymryd rhan oherwydd roeddwn i’n gallu gweld yr effaith enfawr roedd y pandemig yn mynd i’w chael ar ein cymuned ac roeddwn i eisiau cefnogi lle gallwn i.”
“Rwy’n credu ei bod yn bwysig siarad yn agored am iechyd meddwl ym mhob cymuned,” meddai. “Mae hefyd yn bwysig i ymarferwyr ddeall sut y gall ffydd rhywun, boed yn Fwslimaidd, yn Iddewig, yn Gristnogol ac ati, eu helpu i wella o salwch meddwl, neu sut y gall eu ffydd effeithio ar eu hiechyd meddwl yn fwy cyffredinol.”
Yn ogystal â chefnogi’r MMHA, mae gwaith Jamilla yn arwain ymgysylltiad cymunedol SEF Cymru, sefydliad sy’n ymroddedig i helpu plant i oresgyn tangyflawniad addysgol. “Mae mor bwysig hyrwyddo addysg i bobl ifanc, yn enwedig gan fod cymaint ohonyn nhw wedi colli cyfleoedd oherwydd y pandemig,” esboniodd. “Mae angen i’r disgyblion hyn wybod y posibiliadau diddiwedd sydd ar gael iddyn nhw, ac mae’n bwysig bod ganddyn nhw fentoriaid ac athrawon i’w harwain.”
Beth yw ei chyngor ar gyfer y bobl ifanc hynny? “Manteisiwch ar bob cyfle - gallai hyn arwain at ddiddordeb newydd neu dalent nad oeddent yn gwybod bod ganddynt! Cofiwch ofyn am help os oes ei angen!”
![](https://cardiff.imgix.net/__data/assets/image/0008/2740067/jamiulla_author.jpg?w=550&h=&auto=format&fit=crop&q=60&fit=crop)
![](https://cardiff.imgix.net/__data/assets/image/0009/2740059/jamilla_teaser.jpg?w=470&h=264&auto=format&fit=crop&q=60&fit=crop)
Mae gwaith Jamilla wedi bod yn amhrisiadwy i’r gymuned. Cafodd y gwaith hwn ei gydnabod yn ein Gwobrau 2022 (tua) 30 lle derbyniodd wobr cydnabyddiaeth arbennig y gweithredwr cymunedol am ei hymdrechion diflino. Mae’n amlwg y gellir gwneud rhagor i wella darpariaethau iechyd meddwl yn y gymuned Fwslimaidd ac yn ehangach yn y DU, ond mae gwaith Jamilla gyda’r MMHA yn cymryd camau i helpu.